ৰাস্তাৰ কুকুৰবোৰক আৱদ্ধ কৰি ৰাখিব নোৱাৰিব; উচ্চতম ন্যায়ালয়ে সলনি কৰিলে ৰায়, বান্ধি দিলে চৰ্ত!

দিল্লী আৰু ৰাষ্ট্ৰীয় ৰাজধানী অঞ্চল (এনচিআৰ)ৰ পৰা ৰাস্তাৰ কুকুৰবোৰ আঁতৰোৱাৰ সন্দৰ্ভত উচ্চতম ন্যায়ালয়ে নিৰ্দেশৰ সংশোধন কৰিছে। শুকুৰবাৰে ন্যায়াধীশ বিক্ৰম নাথ, সন্দীপ মেহতা আৰু এন ভি অঞ্জৰিয়াৰ বিচাৰপীঠে কয় যে বন্ধ্যাকৰণ আৰু টিকাকৰণৰ পিছত ৰাস্তাৰ কুকুৰবোৰক লৈ যোৱা অঞ্চলত এৰি দিব লাগে। অৱশ্যে এই গোচৰত উচ্চতম ন্যায়ালয়ে চৰ্ত বান্ধি দিছে।

আদালতে কয় যে উন্মাদ বা আক্ৰমণাত্মক প্ৰকৃতিৰ কুকুৰক নিৰ্দিষ্ট আশ্ৰয় শিবিৰত ৰাখিব লাগে। কিন্তু ৰাজহুৱা স্থানত অঘৰী কুকুৰক খুৱোৱাৰ অনুমতি দিয়া নাই। উচচতম ন্যায়ালয়ে নিৰ্দেশ দিছে যে সংশ্লিষ্ট পৌৰসভাসমূহে অঘৰী কুকুৰক খুৱাব পৰাকৈ নিৰ্দিষ্ট স্থান প্ৰস্তুত কৰিব লাগিব।

এগৰাকী চৰকাৰী বিষয়াই জনোৱা মতে, ২০২৩ চনৰ পশু জন্ম নিয়ন্ত্ৰণ আইন অনুসৰি ৰাস্তাৰ কুকুৰক নিৰ্দিষ্ট স্থানৰ পৰা উঠাই নি আৰু বন্ধ্যাকৰণ আৰু টিকাকৰণৰ পিছত সেই ঠাইতে এৰি দিব লাগে।

ইয়াৰ পূৰ্বে ১১ আগষ্টত ন্যায়াধীশ জে বি পাৰ্দিৱালা আৰু ন্যায়াধীশ আৰ মহাদেৱনে অঘৰী কুকুৰৰ ওপৰত উচ্চতম ন্যায়ালয়ে দিয়া নিৰ্দেশক লৈ সমগ্ৰ দেশতে প্ৰতিক্ৰিয়াৰ সৃষ্টি হৈছিল। আদেশত উল্লেখ কৰা হৈছিল যে দিল্লী আৰু ৰাষ্ট্ৰীয় ৰাজধানী অঞ্চলৰ পৰা অহা অঘৰী কুকুৰক নিৰ্দিষ্ট আশ্ৰয় শিবিৰলৈ নিব লাগে। তাত তেওঁলোকক বন্ধ্যাকৰণ কৰি টিকাকৰণ কৰিব লাগে। ইয়াৰ পিছত তেওঁলোকক সেই আশ্ৰয় শিবিৰতে ৰাখিব লাগে।

সমগ্ৰ দেশৰ পশুপ্ৰেমীসকলে সেই নিৰ্দেশৰ বিৰুদ্ধে স্থিতি গ্ৰহণ কৰিছিল। পশুপ্ৰেমী তথা প্ৰাক্তন কেন্দ্ৰীয় মন্ত্ৰী মানেকা গান্ধীয়েও প্ৰধানমন্ত্ৰী নৰেন্দ্ৰ মোডীৰ হস্তক্ষেপৰ দাবীত সৰৱ হৈছিল। ইয়াৰ পাছতে উচ্চতম ন্যায়ালয়ৰ মুখ্য ন্যায়াধীশ বি আৰ গাভাইয়ে তিনিজনীয়া ন্যায়াধীশৰ নতুন বিচাৰপীঠ গঠন কৰি বিষয়টো চোৱাচিতা কৰে। আৰু সেই বিচাৰপীঠেই এই নতুন আদেশ দিছে।