উচ্চতম ন্যায়ালয়: পশ্চিমবংগ আৰু তামিলনাডুৰ ভোটাৰ তালিকা পুনৰীক্ষণ সন্দৰ্ভত নিৰ্বাচন আয়োগক শপতনামা দাখিলৰ নিৰ্দেশ
উচ্চতম ন্যায়ালয়ৰ ন্যায়াধীশ সূৰ্য কান্ত আৰু জয়মল্য বাগচীৰ বিচাৰপীঠে পশ্চিমবংগ আৰু তামিলনাডুৰ ভোটাৰ তালিকাৰ পুনৰীক্ষণৰ বিৰুদ্ধে দাখিল কৰা আবেদনসমূহ সন্দৰ্ভত নিৰ্বাচন আয়োগক দুসপ্তাহৰ ভিতৰত শপতনামা দাখিল কৰিবলৈ নিৰ্দেশ দিছে।
নিৰ্বাচন আয়োগে ৪ নৱেম্বৰৰ পৰা ১২ খন ৰাজ্য আৰু কেন্দ্ৰশাসিত অঞ্চলত ভোটাৰ তালিকাৰ পুনৰীক্ষণৰ কাম আৰম্ভ কৰিছিল। মুখ্য নিৰ্বাচন আয়ুক্ত জ্ঞানেশ কুমাৰে ২৭ অক্টোবৰ তাৰিখে এই নিৰ্দেশনা জাৰি কৰিছিল। যিহেতু পশ্চিমবংগ আৰু তামিলনাডুত বিধানসভা নিৰ্বাচন ২০২৬ চনত অনুষ্ঠিত হ’ব, সেইবাবে এই দুই ৰাজ্যৰ ভোটাৰ তালিকা পুনৰীক্ষণৰ নিৰ্দেশনা জাৰি কৰা হৈছিল। আয়োগে জনাইছে যে খচৰা তালিকা ৯ ডিচেম্বৰত প্ৰকাশ কৰা হ’ব আৰু চূড়ান্ত তালিকা ৭ ফেব্ৰুৱাৰী, ২০২৬ত প্ৰকাশিত হ’ব।
এই দুয়োখন ৰাজ্যৰ আবেদনসমূহত উত্থাপিত অভিযোগ অনুসৰি দ্ৰুতগতিৰে কৰা এই পুনৰীক্ষণৰ ফলত বহু প্ৰকৃত ভোটাৰৰ নাম বাদ পৰাৰ সম্ভাৱনা আছে। নাম বাদ পৰা ভোটাৰসকল ভোটাধিকাৰৰ পৰা বঞ্চিত হোৱাৰ আশঙ্কা প্ৰকাশ কৰিছে।
উচ্চতম ন্যায়ালয়ে পশ্চিমবংগ, তামিলনাডু আৰু বিহাৰৰ উচ্চ ন্যায়ালয়সমূহকো অনুৰূপ গোচৰসমূহ স্থগিত ৰাখিবলৈ নিৰ্দেশ দিছে।
উল্লেখযোগ্য যে, বিহাৰত জুন মাহতেই ভোটাৰ তালিকাৰ পুনৰীক্ষণ সম্পন্ন হৈছিল আৰু ছেপ্টেম্বৰৰ ৩০ তাৰিখে প্ৰকাশিত চূড়ান্ত তালিকাত কমেও ৪৭ লাখ ভোটাৰৰ নাম বাদ পৰিছিল।