২০ বছৰ বয়সতেই জীৱন নাটৰ যৱনিকা! কৰ্কট ৰোগত আক্ৰান্ত হৈ মৃত্যু সম্ভাৱনাময় তৰুণীৰ

মাত্ৰ ২০ বছৰ বয়স। বাস্তৱ জীৱনৰ দৌৰ এতিয়াও আৰম্ভ হোৱা নাছিল৷ কিন্তু তাৰ আগতে সকলো শেষ হৈ গ’ল। কণমানি বয়সতে মাৰাত্মক ৰোগে তৰুণীৰ প্ৰাণ কাঢ়ি নিলে, টি ছিৰিজৰ সহ-প্ৰতিষ্ঠাপক কৃষণ কুমাৰৰ কন্যা তিশাই প্ৰাণ হেৰুৱালে। এই চাঞ্চল্যকৰ খবৰত প্ৰায় সমগ্ৰ চলচ্চিত্ৰ উদ্যোগটো ভাঙি পৰিছে।

কৃষণ কুমাৰ  টি ছিৰিজৰ প্ৰতিষ্ঠাপক তথা চলচ্চিত্ৰ নিৰ্মাতা গুলচন কুমাৰৰ কনিষ্ঠ ভাতৃ। যোৱা কেইবছৰমানৰ পৰা তেওঁৰ কন্যা তিশাৰ স্বাস্থ্য ভালে নাছিল। যোৱা বছৰৰ শেষৰ ফালে এনিমেলৰ প্ৰদৰ্শনীত শেষবাৰৰ বাবে দেখা গৈছিল তিশাক।

কুমাৰৰ পৰিয়ালৰ সূত্ৰ অনুসৰি তিশাক প্ৰথমে মুম্বাইৰ এখন চিকিৎসালয়ত চিকিৎসাৰ বাবে ভৰ্তি কৰা হৈছিল। কিন্তু কোনো লাভ নহ’ল, তেওঁক জাৰ্মানীলৈ লৈ যোৱা হ’ল। কিন্তু তেওঁক ঘূৰাই দিয়া সম্ভৱ নহ’ল। তিশাই জাৰ্মানীত শেষ উশাহ ল’লে।

টি-ছিৰিজৰ এক বিবৃতিত কোৱা হৈছে যে তিশা কুমাৰে দীৰ্ঘদিন ধৰি কৰ্কট ৰোগৰ বিৰুদ্ধে যুঁজি আছিল। তেওঁৰ আত্মাই চিৰশান্তি লাভ কৰক। এই সময়খিনি গোটেই পৰিয়ালটোৰ বাবে অতি কঠিন আৰু সেয়েহে আমি আশা কৰিছো যে আপোনালোকে পৰিয়ালটোৰ গোপনীয়তাক সন্মান কৰিব।