বন্ধ হৈ পৰিল ১৭৮ বছৰীয়া ট্ৰেভেল কোম্পেনি – সংকটত ২২ হাজাৰ লোকৰ চাকৰি

পৃথিৱীৰ সৰ্ববৃহৎ ট্ৰেভেল কোম্পেনি থমাচ কুক (Thomas Cook) যোৱা ৰবিবাৰে বন্ধ হৈ যায়। ১৭৮ বছৰীয়া এই কোম্পেনিটো বন্ধ হৈ পৰাৰ ফলত ২২ হাজাৰ লোকৰ চাকৰি এতিয়া সংকটত।

টকাৰ অভাৱত যুঁজি থকা কোম্পেনিটোৱে বেংকৰ পৰা অতিৰিক্ত ধনৰ অনুৰোধ কৰিছিল যদিও কোনো বেংকে অতিৰিক্ত ধন আদায় নিদিয়াত বন্ধ হৈ পৰে কোম্পেনিটো।

মিডিয়া ৰিপ’ৰ্ট অনুসৰি, কোম্পেনিৱে প্ৰকাশ কৰা এক বিজ্ঞপ্তিত কয় যে কোম্পেনিটো বন্ধ কৰাৰ বাহিৰে আন কোনো বিকল্প নাই।

কোম্পেনিটো বন্ধ হোৱাৰ ফলত কৰ্মচাৰীৰ উপৰি গ্ৰাহক, সৰবৰাহকাৰী তথা কোম্পেনিৰ সহযোগী সকলৰ ওপৰতো বেয়া প্ৰভাৱ পৰিব। সেয়ে থমাচ কুকৰ চিফ এক্সিকিউটিভ পিটৰ ফেংকহাজৰে এইসকলৰ ওচৰত ক্ষমা বিচাৰিছে।

ইফালে য়ুকেৰ অসামৰিক বিমান প্ৰাধিকৰণে কৈছে যে ২৩ ছেপ্তেম্বৰৰ পৰা ৬ অক্টোবৰৰ ভিতৰত চৰকাৰে ডেৰ লাখৰো অধিক বৃটিশ্ব গ্ৰাহকক ঘৰলৈ ওভটাই অনাৰ ব্যৱস্থা গ্ৰহণ কৰিব।

ইতিমধ্যে অসামৰিক বিমান প্ৰাধিকৰণে টুইটৰ জৰিয়তে সকলো বুকিং বন্ধ কৰি দিয়া বুলি জানিবলৈ দিয়ে।

উল্লেখ্য যে বন্ধ হৈ পৰা থমাচ কুক বৃটেইনৰ সবাটোকৈ পুৰণি কোম্পেনিৰ ভিতৰত অন্যতম আছিল। কোম্পেনিটোৱে ১৬খন দেশত এক বছৰত ১৯ মিলিয়ন লোকৰ বাবে হোটেল, ৰিচ’ৰ্ট আৰু বিমান সেৱা আগবঢ়াই আছিল।