সময় মতে পদক্ষেপ গ্ৰহণ কৰিলে দেশত কোভিডৰ তৃতীয় ঢৌ নাহিলহেঁতেন, স্বীকাৰ কৰিলে কেন্দ্ৰই
দেশত এতিয়া কোভিডৰ দ্বিতীয় ঢৌৱে সংহাৰৰ সৃষ্টি কৰিছে। এনে সময়তে অতি কম দিনৰ ভিতৰতে দেশত মহাসংহাৰৰ সৃষ্টি কৰিব কোভিডৰ তৃতীয় ঢৌৱে।
মাত্ৰ দুদিন পূৰ্বে দেশত কোভিডৰ তৃতীয়টো ঢৌ আহিব বুলি প্ৰকাশ কৰিছিল কেন্দ্ৰীয় চৰকাৰৰ প্ৰধান বৈজ্ঞানিক উপদেষ্টা কে বিজয়ৰাঘৱনে।
আজি বিজয়ৰাঘৱনে কয় যে চৰকাৰে যদি সঠিক সময়ত সঠিক পদক্ষেপ গ্ৰহণ কৰিলেহেঁতনে তেন্তে দেশত কোভিডৰ তৃতীয় ঢৌৰ সৃষ্টি নহ’লহেঁতেন।
কেন্দ্ৰীয় চৰকাৰৰ প্ৰধান বৈজ্ঞানিক উপদেষ্টাগৰাকীয়ে এই প্ৰসংগত কয় যে কেন্দ্ৰই যদি প্ৰতিখন ৰাজ্য আৰু কেন্দ্ৰীয় শাসিত অঞ্চলকে কোভিড বিধিসমূহ কঠোৰ ভাবে মানি চলিবলৈ বাধ্য কৰোৱাব পাৰিলেহেঁতেন তেন্তে কোভিডৰ তৃতীয় ঢৌ অহাৰ কোনো আশংকাই নাছিল।
উল্লেখ্য পাঁচ ৰাজ্যৰ নিৰ্বাচনৰ সময়ত অসমকে ধৰি আন কেইবাখনো ৰাজ্যত ভয়াৱহ ভাবে ভংগ কৰা হৈছিল কোভিড প্ৰ’টোকল।
এই ৰাজ্যসমূহত ৰাজনীতিকৰ লগতে লাখ লাখ দলীয় কৰ্মীয়ে মাস্ক পৰিধান নকৰি অথবা সামাজিক দূৰত্বৰ কথা পাহৰি নিৰ্বাচনী সভাত সমবেত হৈছিল।
ফলত ক’ৰ’নাই বহু লোকৰ দেহত বাহ লোৱাৰ সুবিধা পাইছিল। যিবোৰ ৰাজ্যত নিৰ্বাচন নাছিল সেই ৰাজ্যসমূহতো মানি চলা হোৱা নাছিল কোভিডৰ কোনো প্ৰ’টোকল।
ইয়াৰ ফলতে দেশক ঢৌৱাই গৈছে কোভিডৰ দ্বিতীয়টো ঢৌৱে। এতিয়া আহি আছে কোভিডৰ তৃতীয়টো ঢৌ।
যি কথা আজি কেন্দ্ৰীয় চৰকাৰৰ প্ৰধান বৈজ্ঞানিক উপদেষ্টাগৰাকীয়ে অসহায় ভাবে স্বীকাৰ কৰে।
তেওঁ সকলোকে সজাগ আৰু সতৰ্ক হৈ থকাৰ লগতে কোভিড বিধি মানি চলিবলৈ আহ্বান জনাইছে।