দুৰ্গা পূজা কৰি ঘৰলৈ ওভতাৰ পথত দুৰ্ঘটনাত মৃত্যু পুৰোহিতৰ
মহা অষ্টমীৰ পূজা সমাপ্ত কৰি দুৰ্গা পূজাৰ পেণ্ডেলৰ পৰা চাইকেলেৰে ঘৰলৈ উভতি আহি থাকোতে শনিবাৰে ত্ৰিপুৰাত এক পথ দুৰ্ঘটনাত এগৰাকী পুৰোহিতৰ মৃত্যু হয়।
পথ দুৰ্ঘটনাত মৃত্যু হোৱা পুৰোহিতগৰাকীক জীৱন চক্ৰৱৰ্তী বুলি চিনাক্ত কৰা হয়।
ছেপাহিজালা জিলাৰ ছোনামূৰা মহকুমাৰ অন্তৰ্গত ঢালিৰাইত দুৰ্ঘটনাটো সংঘটিত হয়। এখন গাড়ীয়ে আহি তেওঁৰ চাইকেলত খুন্দা মৰাৰ ফলতে পুৰোহিতগৰাকীৰ মৃত্যু হয়।
চক্ৰৱৰ্তীয়ে স্থানীয় এখন পুজা মণ্ডপৰ পুৰোহিত আছিল।
‘’মহা অষ্টমীৰ পূজা সমাপ্ত কৰি চাইকেলেৰে ঘৰলৈ উভতি আহি থকা অৱস্থাত এখন তীব্ৰ বেগী বাহনে খুন্দিওৱাত তেওঁ চাইকেলৰ পৰা ছিটিকি পৰে। দুৰ্ঘটনাত তেওঁ গুৰুতৰভাৱে আহত হয়,’’-সূত্ৰসমূহে কয়।
সূত্ৰসমূহে জানিব দিয়া মতে,’’গুৰুতৰভাৱে আহত পুৰোহিতগৰাকীক ততাতয়াকৈ ছোনামূৰা মহকুমা হাস্পাতললৈ লৈ যোৱা হয় যদিও চিকিৎসকে তেওঁক মৃত ঘোষণা কৰে।‘’
পুৰোহিতগৰাকীৰ মৃত্যুত স্থানীয় অঞ্চলটোত শোকৰ ছাঁ পৰে।