দেশত কৰোনাত ২ জনৰ মৃত্যু, পুনৰ বিয়পিছে সংক্ৰমণ! পৰিস্থিতি কিমান উদ্বেগজনক?

কৰোনা ভাইৰাছে দেশত পুনৰ নতুনকৈ আশংকা বৃদ্ধি কৰিছে। অন্ধ্ৰ প্ৰদেশ আৰু মুম্বাইৰ পৰা নতুনকৈ সংক্ৰমণৰ ঘটনা পোহৰলৈ আহিছে। সাধাৰণ মানুহৰ পৰা চেলিব্ৰিটিলৈকে বহুতেই আক্ৰান্ত হৈছে। সেইটোৱে পুনৰ শংকাৰ পৰিৱেশ সৃষ্টি কৰিছে।

যোৱা কেইসপ্তাহমানৰ ভিতৰত অন্ধ্ৰ প্ৰদেশৰ পৰা দুজন কোভিড-১৯ ৰোগীৰ মৃত্যুৰ খবৰ আহিছে। বৰ্তমান সেই ৰাজ্যত সক্ৰিয় ৰোগীৰ সংখ্যা ৮ জন। ইফালে, মুম্বাইত চৰ্চালৈ আহিছে আন এক সংক্ৰমণৰ ঘটনা।

কোভিডত মৃত্যু হোৱা এজন ব্যক্তিৰ পৰিচয় ইতিমধ্যে জানিব পৰা গৈছে। তেওঁ অন্ধ্ৰ প্ৰদেশৰ কদাপা অঞ্চলৰ বাসিন্দা। তেওঁক চিকিৎসালয়ত ভৰ্তি কৰোৱা হয়। তেওঁৰ ভয়ংকৰ চৰ্দি আৰু কাহ হৈছিল।

জানিব পৰা মতে, তেওঁৰ উশাহ-নিশাহতো সমস্যা হৈছিল। এনে পৰিস্থিতিত চিকিৎসালয়তে তেওঁৰ বুকুৰ এক্স-ৰে কৰা হয়। তাত দেখা যায় যে ব্যক্তিজনৰ দুয়োটা হাওঁফাওঁ বেয়াকৈ আক্ৰান্ত হৈছে। তেওঁৰ তীব্ৰ নিউমোনিয়া হৈছিল। ইয়াৰ পিছত চিকিৎসা আৰম্ভ হ’ল। কিন্তু চিকিৎসকৰ প্ৰচেষ্টা সফল নহ’ল। ব্যক্তিজনে প্ৰাণ হেৰুৱালে।

ইতিমধ্যে মুম্বাইতো কোভিডৰ সংক্ৰমণ ঘটিছে। প্ৰসিদ্ধ কণ্ঠশিল্পী কুমাৰ চানুৰ পুত্ৰ জান কুমাৰ চানুৰ দেহত ক’ভিড পজিটিভ পোৱা গৈছে। বিগ বছৰ প্ৰাক্তন প্ৰতিযোগীগৰাকীয়ে নিজেই ছ’চিয়েল মিডিয়াত এই কথা প্ৰকাশ কৰে। বৰ্তমান তেওঁ চিকিৎসালয়ত ভৰ্তি হৈ চিকিৎসাধীন হৈ আছে।

এতিয়ালৈকে সকলোৱে গম পাইছে যে কৰ’না অতি সংক্ৰামক। ই এজনৰ পৰা আন এজনলৈ দ্ৰুতগতিত বিয়পিব পাৰে। গতিকে, কোভিডৰ প্ৰতি সাৱধান হব লাগিব। এই ভাইৰাছ প্ৰতিৰোধ কৰাটো অতি প্ৰয়োজনীয়। তেনে ক্ষেত্ৰত কিছুমান নিয়ম মানি চলা উচিত।

কোৰোনা ভাইৰাছ হাঁচি, কাহ বা কথা কওঁতে এজনৰ পৰা আন এজনলৈ বিয়পিব পাৰে। গতিকে, ৰাজপথত বা ভিৰৰ মাজত ওলাই যোৱাৰ সময়ত নিশ্চয়কৈ মাস্ক পৰিধান কৰিব। নিয়মিতভাৱে চাবোনেৰে হাত ধোৱাটো অতি প্ৰয়োজনীয়। যদি হাত ধোৱাৰ সুবিধা নাই তেন্তে নিশ্চয়কৈ চেনিটাইজাৰ ব্যৱহাৰ কৰক।

চৰ্দি, কাহ, জ্বৰ এই ভাইৰাছত আক্ৰান্ত হোৱাৰ লক্ষণ। ইয়াৰ লগত উশাহ-নিশাহ লোৱাত অসুবিধাও হ’ব পাৰে। গতিকে, যদি আপুনি এনে কোনো লক্ষণ দেখা পায়, তেন্তে লগে লগে চিকিৎসকৰ পৰামৰ্শ লওক। বিশেষকৈ শিশু আৰু ৬০ বছৰৰ ওপৰৰ লোকে সাৱধান হ’ব লাগে। কেন্সাৰ, ট্ৰান্সপ্লাণ্ট বা আন কোনো কাৰণত যদি আপোনাৰ ৰোগ প্ৰতিৰোধ ক্ষমতা হ্ৰাস পায় তেন্তে সাৱধান হোৱাটো গুৰুত্বপূৰ্ণ।