ছত্তীশগড়ৰ ৰাইপুৰত হেলিকপ্টাৰ দুৰ্ঘটনাগ্ৰস্ত, ২জন পাইলট নিহত
ছত্তীশগড়ৰ ৰাইপুৰত সংঘটিত এক হেলিকপ্টাৰ দুৰ্ঘটনাত দুজন লোকৰ মৃত্যু ঘটিছে। ছত্তীশগড় ষ্টেট হেলিকপ্টাৰখন নিশা প্ৰায় ৯.১০ বজাত ৰাইপুৰৰ স্বামী বিবেকানন্দ বিমানবন্দৰত দুৰ্ঘটনাগ্ৰস্ত হয়।
বাতৰি অনুসৰি, নিয়মীয়া প্ৰশিক্ষণ চলাই থকাৰ সময়তে হঠাৎ হেলিকপ্টাৰখন ভাঙ পৰে। প্ৰাথমিকভাৱে কাৰিকৰী ত্ৰুটিৰ বাবে হেলিকপ্টাৰখন খহি পৰা বুলি সন্দেহ কৰা হৈছে। দুৰ্ঘটনাটোত কেপ্টেইন গোপাল কৃষ্ণ পাণ্ডা আৰু কেপ্টেইন এ পি শ্ৰীবাস্তৱ নিহত হয়।
ঘটনাটোৰ পিছত, ডিজিচিএ আৰু ৰাজ্য চৰকাৰে ঘটনাটোৰ তদন্ত আৰম্ভ কৰিছে। দুৰ্ঘটনাটোৰ কাৰণ কি সেয়া উদ্ধাৰ কৰিবলৈ চেষ্টা চলাই থকা হৈছে।
ৰাজ্যখনৰ মুখ্যমন্ত্ৰী ভূপেশ বাঘেলে দুৰ্ঘটনাত মৃতকৰ পৰিয়াললৈ সমবেদনা জ্ঞাপন কৰি শোক প্ৰকাশ কৰিছে।
সূত্ৰ সমূহে জানিবলৈ দিয়া মতে, অৱতৰণৰ সময়তহে হেলিকপ্টাৰখন দুৰ্ঘটনাগ্ৰস্ত হয়। বিকট শব্দ শুনি বহু মানুহ ঘটনাস্থলীলৈ লৰি আহিছিল। উদ্ধাৰকাৰী দলে পাইলট দুজনক উদ্ধাৰ কৰে। কিন্তু ইতিমধ্যে তেওঁলোকৰ মৃত্যু ঘটে।
ভয়ংকৰ দুৰ্ঘটনাটোত হেলিকপ্টাৰখনৰ বহু অংশ বিধ্বস্ত হৈ পৰে। প্ৰচণ্ড জোৰে হেলিকপ্টাৰখন পাক খাই বিধ্বস্ত ৰূপত ভূপতিত হয়। হেলিকপ্টাৰখন কেনেদৰে এই দুৰ্ঘটনাত পতিত হ’ল সেয়া তদন্ত কৰি থকা হৈছে। ঘটনাটোকলৈ অঞ্চলটোত চাঞ্চল্যৰ সৃষ্টি হয়।