কেব পাছ কেন্দ্ৰীয় কেবিনেটৰ, দিল্লীত প্ৰতিবাদ

নৰেন্দ্ৰ মোদী কেবিনেটে বুধবাৰে নাগৰিকত্ব বিধেয়কত অনুমোদন জনোৱাৰ পিছতে আছুকে ধৰি অসমৰ আঠটা সংগঠনে নতুন দিল্লীত কেবৰ প্ৰতিলিপি দাহ কৰে।

অসম ভৱনৰ সন্মুখত প্ৰতিবাদ সাব্যস্ত কৰি আছুৰ মুখ্য উপদেষ্টা সমুজ্জ্বল কুমাৰ ভট্টাচাৰ্য্যই কয় যে কোনোপধ্যেই তেওঁলোকে বিধেয়কখন গ্ৰহণ নকৰে।

“বিদেশীৰ বিৰুদ্ধে যুঁজি ’৭০ৰ দশকত আমি আমাৰ মানুহ হেৰুৱাইছো। এতিয়া অবৈধ হিন্দু বাংলাদেশীক সাংবিধানিক সুৰক্ষা দিয়া আইন এখন আমি কেনেকে গ্ৰহণ কৰিম,” ভট্টাচাৰ্য্যই কয়।

ভট্টাচাৰ্য্যই কয় যে গৃহ মন্ত্ৰী শ্বাহক এই স্থিতি স্পষ্ট কৰি দিয়া হৈছে।

“আমি গৃহ মন্ত্ৰীক স্পষ্টকৈ কৈছো যে অসমে কোনো মূল্যৰ বিনিময়তে কেব গ্ৰহণ নকৰে,” ভট্টাচাৰ্য্যই নৰ্থইষ্ট নাওক জনায়।

“বিধেয়কখন অসম চুক্তিৰ মূল নীতিৰ বিৰোধী।”

শ্বাহে বিধেয়কখনক লৈ মঙলবাৰে আছুৰ সৈতে দিল্লীত আলোচনাত বহিছিল।

বৈঠকৰ পিছতে প্ৰকাশিত বক্তব্যত স্পষ্ট হৈছিল যে বিজেপি নেতৃত্বাধীন কেন্দ্ৰ বিধেয়ক গ্ৰহণত পিছ নপৰে।

ইফালে কেন্দ্ৰৰ স্থিতি স্পষ্ট হোৱাৰ পিছতে আছুৱে বৃহস্পতিবাৰে গুৱাহাটীৰ শ্বহীদ ন্যাসত এক জৰুৰী কাৰ্য্যনিৰ্বাহক বৈঠক আহ্বান কৰিছে।

আছুৰ এজন শীৰ্ষ নেতাই জনোৱামতে, উক্ত বৈঠকতে বিধেয়কক লৈ তেওঁলোকে পৰৱৰ্তী কাৰ্য্যপন্থা নিৰ্ধাৰণ কৰিব।

বিধেয়কখন অহা ৯ আৰু ১০ ডিচেম্বৰত ক্ৰমে লোক সভা আৰু ৰাজ্য সভাত কেন্দ্ৰই উত্থাপন কৰিব বুলি বাতৰিত প্ৰকাশ।

বিধেয়খন গ্ৰহণৰ “ৰাষ্ট্ৰীয় প্ৰতিশ্ৰুতি” দিয়া বিজেপিয়ে কেব উত্থাপনৰ সময়ত দলৰ সকলো সাংসদকে সদনত উপস্থিত থকাৰ নিৰ্দেশ দিছে।

মোদী কেবিনেটৰ অনুমোদনৰ পূৰ্বে মঙলবাৰে বিজেপিৰ সংসদীয় গোটৰ বৈঠকতো বিষয়টো গুৰুত্বসহকাৰে আলোচনা হৈছে।

বিজেপিৰ সংসদীয় উপ দলপতি ৰাজনাথ সিঙে বিধেয়কখন জম্মু-কাশ্মীৰ বিষয়ক সংবিধানৰ ৩৭০নং অনুচ্ছেদ “বাতিল”ৰ দৰেই অতি গুৰুত্বপূৰ্ণ বুলি সাংসদসকললৈ বাৰ্তা প্ৰেৰণ কৰিছে।

বিজেপি মিত্ৰ অসম গণ পৰিষদক বাদ দি অসমৰ বিধেয়কবিৰোধী দল-সংগঠনসমূহে এতিয়াও তেওঁলোকৰ পূৰ্বৰ স্থিতি বজাই ৰাখিছে।

আন এক সংগঠন কৃষক মুক্তি সংগ্ৰাম সমিতিয়ে বিধেয়কৰ বিৰুদ্ধে “মহাসংগ্ৰাম”ৰ আহ্বানেৰে বৃ্হস্পতিবাৰে গুৱাহাটীত প্ৰতিবাদ কৰাৰ কথা।

লগতে পঢ়ক– কেব উত্থাপনৰ সময়ত সদনত থকাৰ নিৰ্দেশ সকলো বিজেপি সাংসদক, ক্ষুব্ধ মোদী

লগতে পঢ়ক– গৃহ মন্ত্ৰী শ্বাহৰ নিমন্ত্ৰণ প্ৰত্যাখ্যান, কেব বিৰোধিতাত অটল কংগ্ৰেছ