কংগ্ৰেছে নাগৰিকত্ব বিধেয়ক সন্দৰ্ভত আলোচনাৰ বাবে কেন্দ্ৰীয় গৃহ মন্ত্ৰী অমিত শ্বাহে জনোৱা নিমন্ত্ৰণ শুকুৰবাৰে প্ৰত্যাখ্যান কৰিছে।
কংগ্ৰেছ নেতৃত্বই প্ৰকাশ কৰিছে যে দলটোৱে বিধেয়ক বিৰোধিতাত অটল থকাৰ সিদ্ধান্ত লৈছে আৰু সেয়ে শনিবাৰৰ বৈঠকখন বয়কট কৰিছে।
“এই বৈঠকখন অৰ্থহীন (mere eyewash)। চৰকাৰে আগতেই স্থিৰ কৰিছে যে সংসদৰ চলিত শীতকালীন অধিৱেশনত নাগৰিকত্ব বিধেয়ক তেওঁলোকে উত্থাপন কৰিব,” নৰ্থইষ্ট নাওক অসম প্ৰদেশ কংগ্ৰেছ সভাপতি ৰিপুণ বৰাই জনায়।
কংগ্ৰেছৰ উত্তৰ-পূবৰ সাংসদসকলে শুকুৰবাৰে বিধেয়কখনৰ বিৰোধিতাৰে সংসদ চৌহদত এক প্ৰতিবাদো সাব্যস্ত কৰে।
বৰাই জনাই যে বিষয়টোক লৈ দলৰ পূৰ্বৰ স্থিতিৰ কোনো সালসলনি হোৱা নাই আৰু কংগ্ৰেছৰ মত হৈছে বিধেয়কখনে উত্তৰ-পূবৰ খিলঞ্জীয়াৰ ক্ষতি কৰিব।
“কেব অসম চুক্তিৰ একেবাৰে নীতিৰে বিৰোধী। ই অঞ্চলটোৰ খিলঞ্জীয়াসকলৰ পৰিচয়ক বিপদত পেলোৱাই নহয় তেওঁলোকৰ মৌলিক অধিকাৰতো আঘাত হানিব,” বৰাই কয়।
বিধেয়ক সন্দৰ্ভত আলোচনাৰ বাবে শ্বাহে উত্তৰ-পূবৰ ৰাজনৈতিক নেতা, ছাত্ৰ নেতাৰ লগতে বিভিন্ন সংগঠন, নাগৰিক সমাজৰ প্ৰতিনিধিৰ সৈতে এলানি বৈঠক আয়োজন কৰিছে।
সূত্ৰমতে, ত্ৰিপুৰা আৰু মিজোৰামৰ প্ৰতিনিধিসকলৰ সৈতে শুকুৰবাৰে ৰাতি নতুন দিল্লীত প্ৰথম দুখন বৈঠক অনুষ্ঠিত হ’ব।
অন্তিমবাৰ বিধেয়কখন সদনত উত্থাপন হওঁতে কংগ্ৰেছে ইয়াৰ বিৰোধিতা কৰিছিল।
লোক সভাত বিধেয়কখন গৃহীত হৈছিল যদিও ইয়াক ৰাজ্য সভাত দাখিলৰ পৰা অন্তিম মুহূৰ্তত চৰকাৰ বিৰত আছিল।
কংগ্ৰেছৰ পৰা চি পি আই (এম)লৈকে দলসমূহে তেওঁলোকৰ সংখ্যাগৰিষ্ঠতা নথকা সদনত বিধেয়কখনৰ বিৰোধিতাৰ আশ্বাস দি আহিছে।
তাৎপৰ্য্যপূৰ্ণভাৱে কিন্তু বিধেয়কখনৰ বিৰোধিতা কৰা দলকেইটাই উত্তৰ-পূবৰ বাহিৰত নিজে ক্ষমতাত থকা ৰাজ্যতো (যেনে– ৰাজস্থান, কেৰালা) কোনো আন্দোলন থিয় কৰোৱা দেখা যোৱা নাই।
উত্তৰ-পূবক বাদ দি ভাৰতৰ আন কোনো ৰাজ্যত বিধেয়কৰ বিৰুদ্ধে কোনো প্ৰতিবাদ হোৱা নাই আৰু ৰাজ্যসমূহৰ পৰা বিষয়টোত কেন্দ্ৰৰ ওপৰত চাপ শূন্য।
কাৰ্য্যতঃ “গোটেই ভাৰতত প্ৰযোজ্য হ’ব লগা” বিধেয়কখনৰ বিৰুদ্ধে ৰাজপথত নামিছে কেৱল উত্তৰ-পূবৰ খিলঞ্জীয়ানিৰ্ভৰ সংগঠনসমূহ।
বিধেয়কক লৈ গঠিত যুটীয়া সংসদীয় সমিতিয়ে ইয়াক গৃ্হীত কৰাৰ বাবে যোৱা জানুৱাৰিত পৰামৰ্শ আগবঢ়াইছিল।
“যুটীয়া সংসদীয় সমিতিয়ে পৰামৰ্শ দিয়ে যে সংশোধন কৰা ৰূপত বিধেয়কখন গৃ্হীত কৰিব লাগে আৰু আন মন্তব্য/ পৰামৰ্শসমূহ বিবেচনা কৰিব লাগে,” যোৱা ৪ জানুৱাৰিত অধ্যক্ষ ৰাজেন্দ্ৰ অগ্ৰৱালে স্বাক্ষৰ কৰা প্ৰতিবেদনত উল্লেখ।
বিধেয়কখন সংখ্যাৰ জোৰত বিজেপি নেতৃত্বাধীন চৰকাৰে পাছ কৰিব বুলি অসমৰ বহু প্ৰতিবাদীয়ে আশংকা কৰিছে আৰু উচ্চতম ন্যায়ালয়ত আইনী যুঁজ চলোৱাৰ বাবে সাজু হৈছে।
বিধেয়কখন শাসক বিজেপিৰ “ৰাষ্ট্ৰীয় প্ৰতিশ্ৰুতি”। বৰ্তমান দুয়ো সদনতে তেওঁলোক সৰ্বাধিক সদস্য থকা দল।
২০১৬ চনত তদানীন্তন গৃহ মন্ত্ৰী ৰাজনাথ সিঙে প্ৰথমে সদনত নাগৰিকত্ব বিধেয়কখন উত্থাপন কৰিছিল।
বিধেয়কখনে ভাৰতৰ চুবুৰীয়া পাকিস্তান, বাংলাদেশ আৰু আফগানিস্তানৰ অমুছলমান ধৰ্মীয় সংখ্যালঘু (হিন্দু, বৌদ্ধ, জেন, পাৰ্ছি, শিখ আৰু খ্ৰীষ্টান)ৰ ভাৰতীয়কৰণৰ চৰ্ত শিথিল কৰিব খুজিছিল।
চলিত শীতকালীন অধিৱেশনত উত্থাপন হ’ব লগা বিধেয়কখন পূৰ্বতকৈ কিছু সালসলনি কৰা হৈছে বুলি অসমৰ মন্ত্ৰী হিমন্ত বিশ্ব শৰ্মাই মন্তব্য কৰিছিল।
শৰ্মাই নতুন বিধেয়কত উত্তৰ-পূবৰ “অনন্য পৰিচয়”ৰ কথা মনত ৰখা হ’ব বুলি জনাইছিল।
কিন্তু, উত্তৰ-পূবৰ প্ৰতিবাদী সংগঠনসমূহে কোনো ৰূপতেই বিধেয়কখন গ্ৰহণ নকৰে বুলি ভাৰত চৰকাৰক জনাই আহিছে।
