ক’ৰ’নাত মৃত্যু হোৱা লোকৰ পৰিয়াললৈ ১ লাখ টকাৰ আৰ্থিক অনুদান ঘোষণা উত্তৰাখণ্ড চৰকাৰৰ
ক’ৰ’নাৰ সংক্ৰমণৰ ফলত মৃত্যু হোৱা লোকৰ পৰিয়াললৈ আৰ্থিক অনুদান ঘোষণা কৰিছে উত্তৰাখণ্ড চৰকাৰে।
উত্তৰাখণ্ডৰ মুখ্য মন্ত্ৰী ত্ৰিবেন্দ্ৰ সিং ৰাৱাটে বৃহস্পতিবাৰে ৰাজ্যখনত যিসকল লোকে ক’ৰ’নাৰ ফলত প্ৰাণ হেৰুৱাব সেইসকল লোকৰ পৰিয়াললৈ ১ লাখ টকাৰ আৰ্থিক সাহায্য আগবঢ়াব বুলি ঘোষণা কৰে।
মুখ্য মন্ত্ৰী গৰাকীয়ে উত্তৰাখণ্ডৰ ৰাজধানী ডেৰাডুন প্ৰতি সপ্তাহৰ শনিবাৰ আৰু দেওবাৰে সম্পূৰ্ণ ৰূপে বন্ধ থাকিব বুলিও লগতে ঘোষণা কৰে।
ৰাজধানী চহৰখনৰ বিভিন্ন অঞ্চল চেনিটাইজ কৰাৰ বাবেই উক্ত সিদ্ধান্ত গ্ৰহণ কৰা হৈছে বুলি কয়।
উত্তৰাখণ্ডত বৰ্তমানলৈ ১,১৪৫ গৰাকী লোক ক’ৰ’না ভাইৰাছৰ দ্বাৰা সংক্ৰমিত হৈছে।
উল্লেখযোগ্য যে, ভাৰতত বৰ্তমান দ্ৰুত গতিত ক’ৰ’না ভাইৰাছৰ সংক্ৰমণ বৃদ্ধি পাইছে।
দেশত ক’ৰ’না ভাইৰাছৰ সংক্ৰমণৰ সংখ্যাই ২ জুনতে ২ লাখ অতিক্ৰম কৰিছে। ভাৰতত ক’ৰ’নাৰ পৰা আৰোগ্য লাভ কৰা লোকৰ সংখ্যাও ১ লাখ অতিক্ৰম কৰিছে।