যোগী আদিত্যনাথৰ শিৰনত: উচ্চতম ন্যায়ালয়ৰ সকিয়নীত থৰকাছুটি হেৰাল উত্তৰ প্ৰদেশ চৰকাৰৰ

যোগী আদিত্যনাথৰ উত্তৰ প্ৰদেশ চৰকাৰ অৱশেষত বাধ্য হ’ল শিৰনত কৰিবলৈ। উত্তৰ প্ৰদেশ চৰকাৰৰ অবিবেচকী আৰু টোঘলকী জনবিৰোধী নীতি পৰিত্যাগ কৰিবলৈ উচ্চতম ন্যায়ালয়ে সকিয়নী দিয়াৰ পাছতে যোগী চৰকাৰে সেও মানিবলৈ বাধ্য হৈছে।

উত্তৰ প্ৰদেশ চৰকাৰে ২০১৯ চনত নাগৰিকত্ব আইন বিৰোধী প্ৰতিবাদৰ সময়ত ক্ষতি হোৱা সম্পত্তিৰ ক্ষতিপূৰণ প্ৰতিবাদকাৰী সকলৰ পৰা উদ্ধাৰ কৰা হ’ব বুলি জাননী জাৰী কৰিছিল।

চৰকাৰৰ এই সিদ্ধান্তৰ বিৰুদ্ধে উচ্চতম ন্যায়ালয়ে ৰায় ঘোষণা কৰি জাননী বাতিল কৰিবলৈ নিৰ্দেশ দিয়াৰ পাছত আজি উত্তৰ প্ৰদেশ চৰকাৰে জাৰি কৰা ২৭৪ খন জাননী প্ৰত্যাহাৰ কৰিছে বুলি উচ্চতম ন্যায়ালয়ত সদৰি কৰিছে।

ৰাজ্য চৰকাৰে শীৰ্ষ আদালতত লগতে জনায় যে এক নতুন আইন প্ৰণয়নৰ জৰিয়তে এনে ক্ষতিপূৰণ সংগ্ৰহ প্ৰক্ৰিয়া নিৰ্ধাৰণ কৰিব আৰু নতুন আইনৰ অধীনত গঠন কৰা ন্যায়াধিকৰণে এনে বিষয়ৰ মোকাবিলা কৰিব।

ৰাজ্যৰ অতিৰিক্ত অধিবক্তা জেনেৰেল গৰিমা প্ৰশাদে ন্যায়াধীশ ডি ৱাই চন্দ্ৰচূড় আৰু সূৰ্য কান্তৰ বিচাৰপীঠক এই প্ৰতিশ্ৰুতি দিয়ে।

বিচাৰপীঠে লগতে চৰকাৰে জাৰি কৰা জাননীৰ আধাৰত সংগ্ৰহ কৰা ক্ষতিপূৰণ ঘূৰাই দিবলৈও নিৰ্দেশ দিয়ে।

উল্লেখ্য যে যোৱা ১১ ফেব্ৰুৱাৰীত উত্তৰ প্ৰদেশ চৰকাৰৰ জাননীৰ ওপৰত অসন্তুষ্টি প্ৰকাশ কৰি উচ্চতম ন্যায়ালয়ে উত্তৰ প্ৰদেশ চৰকাৰক অন্তিম স্থগিতাদেশ প্ৰদান কৰিছিল।

যোগী চৰকাৰৰ এই কাৰ্যক বে-আইনী আখ্যা দিছিল সৰ্ব্বোচ্চ ন্যায়ালয়ে। প্ৰতিবাদকাৰীৰ সম্পত্তিৰ ওপৰত এনেকৈ বেআইনীভাৱে অধিকাৰ সাব্যস্ত কৰিবলৈ যোৱা কাৰ্য অতি সোনকালে প্ৰত্যাহাৰ কৰিবলৈ সতৰ্ক কৰি দিছিল ন্যায়ালয়ে।

তদুপৰি শীৰ্ষ আদালতে উত্তৰ প্ৰদেশ চৰকাৰক ভৰ্ৎসনা কৰি চৰকাৰে আদালতৰ ৰায়ক উপেক্ষা কৰিলে ফলাফলৰ বাবে সাজু হৈ থাকিব লাগিব বুলি সকিয়নী দিছিল।

উচ্চতম ন্যায়ালয়ৰ আদেশ কেনেদৰে অনুসৰণ কৰা হয় সেই বিষয়ে উত্তৰ প্ৰদেশ চৰকাৰক শিকোৱা হ’ব বুলিও বিচাৰপীঠে উল্লেখ কৰিছিল।

ন্যায়ালয়ে যোগী চৰকাৰক এই বেআইনী প্ৰক্ৰিয়া প্ৰত্যাহাৰ কৰিবলৈ ১৮ ফেব্ৰুৱাৰীলৈকে সময়-সীমা বান্ধি দিছিল।