ৰাস্তাৰ কুকুৰৰ দলে কামুৰি ছিৰাছিৰ কৰি পেলালে মহিলাৰ শৰীৰ; ৰাতিপুৱাই কুকুৰৰ আক্ৰমণত মৃত্যু!

ৰাতিপুৱাই পথাৰলৈ যোৱাৰ পথত এদল ৰাস্তাৰ কুকুৰৰ কামোৰত মৃত্যু ঘটে মধ্যপ্ৰদেশৰ এগৰাকী আদবয়সীয়া মহিলাৰ। প্ৰত্যক্ষদৰ্শীৰ মতে, ৰাস্তাৰ কুকুৰৰ দলে মহিলাগৰাকীক মাটিত পেলাই কামুৰি মাংস ছিৰাছিৰ কৰি পেলাইছিল। আৰক্ষীৰ সূত্ৰ অনুসৰি, মৰণোত্তৰ পৰীক্ষাৰ প্ৰতিবেদনতো এদল কুকুৰে কামোৰাৰ ফলতেই যে মহিলাগৰাকীৰ মৃত্যু ঘটিছে সেয়া প্ৰকাশ পাইছে।

আৰক্ষী বিষয়াই জনোৱা মতে, ৫৫ বছৰীয়া মহিলাগৰাকী মধ্যপ্ৰদেশৰ ছিবনী জিলাৰ মুন্দ্ৰাই গাঁৱৰ বাসিন্দা আছিল। মৃত মহিলাগৰাকীৰ এজন আত্মীয়ই দাবী কৰা মতে, শনিবাৰে পুৱা প্ৰায় ৭ বজাত মহিলাগৰাকী ঘৰৰ সমীপৰ এখন পথাৰলৈ গৈ আছিল। তাত এজোপা গছৰ তলত ৰাস্তাৰ কুকুৰৰ দল এটাই তেওঁৰ ওপৰত আক্ৰমণ চলায়।

লগতে পঢ়ক: চন্দ্ৰৰ মাটিত পোৱা গৈছে অক্সিজেন; সম্ভৱ হ’ব মানুহৰ বসতি? নাছাৰ পৰীক্ষাত নতুন আশা

আশে-পাশে থকা লোকে জানিবলৈ দিয়ে যে কুকুৰবোৰে মহিলাগৰাকীক মাটিত পেলাই লৈ কামুৰিছিল। তেওঁলোকে লগে লগে আৰক্ষীক খবৰ দিয়ে। কাঁহীৱাড়া থানা এলেকাৰ এই ঘটনা সন্দৰ্ভত বন বিভাগকো অৱগত কৰা হৈছে।

কাঁহীৱাড়া আৰক্ষী থানাৰ ভাৰপ্ৰাপ্ত বিষয়া মুনিছ সিং বাইছে স্বীকাৰ কৰে যে মহিলাগৰাকীৰ কুকুৰৰ আক্ৰমণত মৃত্যু হৈছে। তেওঁ জানিবলৈ দিয়ে যে ‘’মৰণোত্তৰ পৰীক্ষাত মহিলাগৰাকীৰ মৃতদেহত জন্তুৱে কামোৰাৰ গভীৰ ঘা পোৱা গৈছে। কুকুৰে কামোৰাৰ ফলতেই মহিলাগৰাকীৰ মৃত্যু হ’ব পাৰে। কিয়নো ইয়াৰ বাহিৰে তেওঁৰ মৃতদেহত আন কোনো আঘাতৰ চিন পোৱা নাই।”

লগতে পঢ়ক: প্ৰতিজন মানুহৰে থাকে দুখন মুখ! চাণক্যৰ মতে প্ৰকৃত বন্ধু চিনি পোৱাৰ ৪টা উপায়

অৱশ্যে আৰক্ষীয়ে কয় যে মহিলাগৰাকীৰ মৃতদেহ ফৰেনছিক বিশেষজ্ঞৰ দ্বাৰা পৰীক্ষা কৰাৰ পিছতহে সমগ্ৰ বিষয়টো স্পষ্ট হ’ব।