কাজিৰঙাত মেডিয়া ফৰ ৱাইল্ড লাইফৰ উদ্যোগত বন্যপ্ৰাণী সাংবাদিকতাৰ ওপৰত মনোজ্ঞ কৰ্মশালা 

মেডিয়া ফৰ ৱাইল্ড লাইফ নামৰ সংগঠনটোৰ উদ্যোগত কাজিৰঙা ৰাষ্ট্ৰীয় উদ্যানৰ সহযোগত আজি কাজিৰঙাৰ কহঁৰাত থকা পৰমানন্দ লাহন প্ৰেক্ষাগৃহত নৈতিক বন্যপ্ৰাণী সাংবাদিকতাৰ শীৰ্ষক এক বিশেষ কৰ্মশালা অনুষ্ঠিত হয়।

দেশৰ আগশাৰীৰ প্ৰকৃতি সংগঠন আৰণ্যক, বিশ্ব প্ৰকৃতি নিধি, নন্দ তালুকদাৰ ন্যাস, আছাম এলিফেন্ট ট্ৰাষ্ট আৰু ৱাইল্ড লাইফ ট্ৰাষ্ট অৱ ইণ্ডিয়াৰ বিশেষ সহযোগিতাৰে অনুষ্ঠিত আজিৰ এই কৰ্মশালাত কলিয়াবৰ, কাজিৰঙা, বোকাখাত, নুমলীগড় আৰু গোলাঘাটকে ধৰি মুঠ ৩৫ গৰাকী সাংবাদিকে অংশগ্ৰহণ কৰে।

কাজিৰঙা ৰাষ্ট্ৰীয় উদ্যানৰ সঞ্চালক পি শিৱকুমাৰে শুভাৰম্ভ কৰা কৰ্মশালাৰ আঁত ধৰে ৰাজ্যখনৰ জ্যেষ্ঠ সাংবাদিক মৃণাল তালুকদাৰ আৰু প্ৰনয় বৰদলৈয়ে।

বন্যপ্ৰাণী সাংবাদিকতাত সাংবাদিকৰ আচৰণ বিধি, আইনগত দিশ, সুবিধা-অসুবিধাৰ আদি বিভিন্ন দিশত আলোকপাত হোৱা কৰ্মশালাত ৰাজ্যৰ তথ্য আয়ুক্ত সমুদ্ৰ গুপ্ত কাশ্যপ, জ্যেষ্ঠ সাংবাদিক ৰাহুল কৰ্মকাৰ, আৰণ্যকৰ সচিব প্ৰধান ড৹ বিভৱ কুমাৰ তালুকদাৰ, বিশ্ব প্ৰকৃতি নিধিৰ জ্যেষ্ঠ সমন্বয়ক ড৹ অনুপম শৰ্মা আৰু হিতেন বৈশ্য, ৱাইল্ড লাইফ ট্ৰাষ্ট অৱ ইণ্ডিয়াৰ উপ সঞ্চালক ড৹ ৰথীন বৰ্মন, অপুৰ্ব বল্লভ গোস্বামী আৰু কাজিৰঙাৰ ডি এফ অ’ ৰমেশ কুমাৰ গগৈয়ে সমল ব্যক্তি হিচাবে অংশ গ্ৰহন কৰে।

সমল ব্যক্তি সকলে অংশ গ্ৰহণকাৰী সাংবাদিকৰ বিভিন্ন প্ৰশ্নৰ উত্তৰেৰে আলোচনাত অংশ লয়। জ্যেষ্ঠ সাংবাদিক শান্তনু নন্দন শৰ্মা আৰু তৰা আগ্ৰৱালো অনলাইনৰ জৰিয়তে কৰ্মশালত অংশ গ্ৰহণ কৰে।

কৰ্মশালাৰ শেষত মেডিয়া ফৰ ৱাইল্ড লাইফৰ উদ্যোগত ৰাজ্যত নৈতিক বন্যপ্ৰাণী সাংবাদিকতাৰ ক্ষেত্ৰত এক বাৰ্ষিক বঁটা প্ৰদানৰ কথা ঘোষণা কৰা হয়।

এই বঁটাৰ লগতে পঞ্চাশ হাজাৰ টকাও প্ৰদান কৰা হ’ব বুলি মৃণাল তালুকদাৰে ঘোষণা কৰে।

সাংবাদিক উত্তম শইকীয়াৰ আহ্বানৰ আধাৰতে ৰাজ্যত বন্যপ্ৰাণী সাংবাদিকতাৰ এক আচৰণ বিধিৰ খচৰা শীঘ্ৰেই প্ৰস্তুত কৰাৰ বাবেও কৰ্মশালাত সিদ্ধান্ত গ্ৰহণ কৰা হয়।

কৰ্মশালাৰ শেষত অংশগ্ৰহণকাৰী সকলো সাংবাদিককে একোখনকৈ মানপত্ৰ প্ৰদান কৰা হয়।