কৰ’নাৰ সংক্ৰমণৰ বাবে পুনৰ সংকটত দেশৰ এখন ৰাজ্য! বন্ধ কৰি দিয়া হৈছে স্কুল-কলেজ
কেইমাহমান পূৰ্বেও নিয়ন্ত্ৰণহীন হৈ পৰিছিল মহাৰাষ্ট্ৰত কৰ’নাৰ সংক্ৰমণৰ হাৰ। কিন্তু শেহতীয়া কেইদিন ধৰি কৰ’না আক্ৰান্তৰ সংখ্যা অত্যাধিক বৃদ্ধি পাবলৈ লৈছে। কৰ’নাৰ সংকটত পুনৰ অস্থিৰতাৰ দিশে গতি কৰিছে ৰাজ্যখন।
মহাৰাষ্ট্ৰত নতুনকৈ ১৫,৮১৭জন কৰ’নাত আক্ৰান্ত হৈছে। মুঠ আক্ৰান্তৰ সংখ্যা ২২,৮২,১৯১জনলৈ বৃদ্ধি পাইছে। ইয়াৰ ভিতৰত ৫২,৭২৩জনৰ মৃত্যু হৈছে।
ৰাজ্যখনৰ বিভিন্ন স্থানত লকডাউন তথা নাইট কাৰ্ফিউ জাৰি কৰাৰ পাছতো শুকুৰবাৰে পুনৰ আক্ৰান্তৰ সংখ্যাই ৰেকৰ্ড গঢ়িছে।
কৰ’নাৰ নতুন ষ্ট্ৰেইনৰ ফলত দেশত সংক্ৰমণ পুনৰ বৃদ্ধি পাবলৈ ধৰিছে আৰু বিশেষকৈ মহাৰাষ্ট্ৰত সংক্ৰমণ উদ্বেগজনকভাৱে বৃদ্ধি পাইছে।
ইতিমধ্যে, জিলাই জিলাই সংক্ৰমণৰ হাৰ অধিক হ’লেই স্থানীয় প্ৰশাসনৰ ফালৰ পৰা কঠোৰ ব্যৱস্থা গ্ৰহণ কৰা হৈছে। প্ৰশাসনৰ তৰফৰ পৰা ৰাজ্যখনৰ ডাঙৰ চহৰসমূহৰ লগতে জিলাসমূহতো লকডাউন, নিশাৰ কাৰ্ফিউ জাৰি কৰা হৈছে।
সদ্যহতে স্কুল-কলেজসমূহ বন্ধ ৰখা হৈছে। পৰিস্থিতি উন্নত হ’লে স্কুলসমূহ ৩১ মাৰ্চৰ পাছত খুলিব পাৰে বুলি জানিবলৈ দিয়া হৈছে।
নাগপুৰত লকডাউনৰ পাছত পুনেতো আংশিক লকডাউন জাৰি কৰা হৈছে।
ৰাজ্য প্ৰশাসনে নিশা ১০ বজাৰ ভিতৰত হোটেল, ৰেষ্টুৰেন্ট, পাবসমূহ বন্ধ কৰাৰ নিৰ্দেশ দিছে। সেইদৰে ৰেষ্টুৰেন্ট, পাবসমূহত প্ৰতিদিনে ৫০ শতাংশ লোকৰ প্ৰৱেশৰহে অনুমতি দিয়া হৈছে।
আনহাতে, মহাৰাষ্ট্ৰ চৰকাৰে সকলোধৰণৰ সমাৱেশ বন্ধ কৰিছে। সেইদৰে, সকলো ধৰণৰ ৰাজনৈতিক, ধৰ্মীয় তথা সামাজিক অনুষ্ঠান আয়োজনত নিষেধাজ্ঞা জাৰি কৰা হৈছে।