প্ৰেয়সীক হত্যা কৰি ফ্লেটৰ ৱালত লুকুৱাই ৰাখি আৰক্ষীৰ হাতত গ্ৰেপ্তাৰ হৈছে এজন প্ৰেমিক।
ঘটনাটো সংঘটিত হৈছে মহাৰাষ্ট্ৰৰ পালঘৰ জিলাত।
আৰক্ষীয়ে প্ৰকাশ কৰা তথ্য অনুসৰি ৩০ বছৰীয়া প্ৰেমিকজনে যোৱা ২১ অক্টোবৰত ৩২ বছৰীয়া নিজ প্ৰমিকাক হত্যা কৰি নিজৰ ফ্লেটৰ ৱালত লুকুৱাই ৰাখিছিল।
পৰিয়ালৰ লোকে কন্যাই কিছুদিন যোগাযোগ নকৰাত প্ৰেমিকক এই বিষয়ে সোধাত প্ৰেয়সীয়ে গুজৰাটৰ ভাপিলৈ গুচি যোৱা বুলি জানিবলৈ দিয়ে পৰিয়ালক।
ইয়াৰ পিছতো যোৱা চাৰি মাহে নিজ কন্যাৰ কোনো সন্ধান লাভ নকৰাত পৰিয়ালৰ লোকে অৱশেষত আৰক্ষীৰ কাষ চাপে আৰু আৰক্ষীয়ে ঘটনা সন্দৰ্ভত তদন্ত প্ৰক্ৰিয়া আৰম্ভ কৰে।
আৰক্ষীয়ে প্ৰেমিকক আটক কৰি জেৰা কৰাত ঘটনা সন্দৰ্ভত সকলো কথা আৰক্ষীৰ আগত প্ৰকাশ কৰে আৰু আৰক্ষীয়ে প্ৰেমিকৰ ফ্লেটৰ ৱালত লুকুৱাই ৰখা অৱস্থাত প্ৰেয়সীৰ কংকালসাৰ উদ্ধাৰ কৰে।
আৰক্ষীৰ আগত প্ৰেমিকে দিয়া স্বীকাৰোক্তিৰ মতে তেওঁলোকৰ মাজত যোৱা পাঁচ বছৰ প্ৰেমৰ সম্পৰ্ক আছিল আৰু প্ৰেয়সীয়ে বিয়াৰ বাবে বাৰে বাৰে হেঁচা দিয়াৰ বাবেই তেওঁ প্ৰেয়সীক হত্যা কৰে।
ইতিমধ্য প্ৰেয়সীৰ পৰিয়ালৰ লোকৰ এজাহাৰ ভিত্তিত হত্যাৰ গোচৰ ৰুজু কৰি আৰক্ষীয়ে ভাৰতীয় দণ্ডবিধি আইনৰ অধীনত অভিযুক্ত প্ৰেমিকক গ্ৰেপ্তাৰ কৰিছে।
