ক’লা যাদুৰ সন্দেহৰ ভিত্তিত চুবুৰীয়াই ৭৭ বছৰীয়া এগৰাকী মহিলাক গৰম লোহাৰ ৰডেৰে গুৰুতৰভাৱে প্ৰহাৰ কৰাৰ অভিযোগ উত্থাপন হৈছে। আনকি প্ৰস্ৰাৱ খাবলৈয়ো বাধ্য কৰাইছিল বুলি অভিযোগ উত্থাপন হৈছে। মহাৰাষ্ট্ৰৰ অমৰাৱতী জিলাত সংঘটিত হৈছে এই ঘটনা।
আৰক্ষীৰ সূত্ৰ অনুসৰি যোৱা বছৰৰ ৩০ ডিচেম্বৰত এই ঘটনা সংঘটিত হৈছিল যদিও নতুন বছৰৰ আৰম্ভণিতে এই অভিযোগ দাখিল কৰা হৈছিল। জানিব পৰা মতে, ঘটনাৰ দিনা বৃদ্ধাগৰাকী ঘৰত অকলে আছিল। চুবুৰীয়াই সন্দেহ কৰিছে যে বুঢ়ীগৰাকীয়ে নিজৰ ঘৰতে ক’লা যাদু চলাই আহিছে। ইয়াৰ পাছত গাঁওবাসীয়ে প্ৰথম অৱস্থাত কেৱল চৰ মাৰি ৭৭ বছৰীয়া বৃদ্ধাগৰাকীক লাঠিৰে প্ৰহাৰ কৰিছিল যদিও পাছলৈ হিংসাৰ পৰিমাণ বাঢ়িছিল।
অভিযোগ অনুসৰি, তাৰ পাছত বৃদ্ধাগৰাকীৰ হাত-ভৰি গৰম লোহাৰ ৰডেৰে জ্বলাই দিয়া হয়। প্ৰহাৰৰ উপৰিও বৃদ্ধাগৰাকীয়ে প্ৰস্ৰাৱ খাবলৈ আৰু কুকুৰৰ মল খাবলৈ বাধ্য হয়। তাতো শেষ নহ’ল, খবৰ পোৱা গৈছে যে শেষত গাঁৱৰ মানুহে ডিঙিত জোতাৰ মালা লৈ ঘূৰিবলৈ বাধ্য কৰাইছিল।
কিন্তু যদিও চুবুৰীয়াৰ ভয়ত বৃদ্ধাগৰাকীয়ে আৰক্ষী থানাত এজাহাৰ দাখিল কৰিব পৰা নাছিল, তথাপিও জানিব পৰা মতে, জানুৱাৰী মাহৰ প্ৰথম সপ্তাহত বুঢ়ীগৰাকীৰ পুত্ৰ আৰু বোৱাৰীয়ে আৰক্ষীক এজাহাৰ দাখিল কৰিছিল। সেই সময়ত তেওঁলোক ঘৰত নাছিল। কামৰ বাবে ওলাই আহিছিল। তাৰ পাছত ৫ জানুৱাৰীত ঘৰলৈ উভতি আহি সমগ্ৰ বিষয়টো জানিব পাৰি অমৰাৱতী জিলা উপায়ুক্ত আৰু আৰক্ষী অধীক্ষকৰ ওচৰলৈ গৈ এজাহাৰ দাখিল কৰে। অনতিপলমে কঠোৰ ব্যৱস্থা গ্ৰহণ কৰিবলৈ দাবী জনায়।
অমৰাৱতী আৰক্ষী অধীক্ষকে জনোৱা মতে, মহিলাগৰাকীয়ে জংঘলৰ ভিতৰত এটা সৰু ঘৰত বাস কৰিছিল। পুত্ৰ বোৱাৰী বেছিভাগ সময় কামৰ বাবে আঁতৰত আছিল। বৃদ্ধাগৰাকীৰ সৈতে কথা পতাৰ পাছত আৰক্ষীয়ে জানিব পাৰিছে যে চুবুৰীয়াই সন্দেহৰ ভাবত নৃশংসভাৱে অত্যাচাৰ চলাই আহিছে।
আৰক্ষী অধীক্ষকে আশ্বাস দিয়ে যে যদিহে থানাই অভিযোগ ল’বলৈ অস্বীকাৰ কৰা দেখা যায়, তেন্তে তেওঁক মুকলি কৰি দিয়াৰ কোনো উপায় নাথাকিব। অভিযোগ উত্থাপন কৰা সকলোকে শীঘ্ৰে গ্ৰেপ্তাৰ কৰা হ’ব। ইতিমধ্যে আৰক্ষীয়ে গাঁওখনলৈ গৈ স্থানীয় ৰাইজৰ পৰা এই বিষয়ে জানিবলৈ চেষ্টা চলাইছে।
