ক্ৰিকেটৰ খেলপথাৰত হাতত বেট আৰু গ্ল’ভছ পিন্ধি ভাৰতীয় দলৰ প্ৰাক্তন অধিনায়ক ‘কেপ্টেইন কুল’ মহেন্দ্ৰ সিং ধোনীয় বহু সুন্দৰ ইনিংছ উপহাৰ দিছে।
কিন্তু এইবাৰ তেওঁ দৃষ্টি আকৰ্ষণ কৰিছে কৃষিকৰ্ম তথা ব্যৱসায়েৰে। ধোনীয়ে নিজৰ দ্বিতীয় ইনিংছ আৰম্ভ কৰিছে ব্যৱসায়েৰে।
সম্প্ৰতি ধোনীৰ পামত খেতি কৰা জৈৱিক পাচলি বজাৰত বিক্ৰী হৈছে আৰু গ্ৰাহকেও সেই পাচলিবোৰ পছন্দ কৰিবলৈ আৰম্ভ কৰিছে।
ব্যৱসায়িক বুদ্ধি খটুৱাই ধোনীয়ে তেওঁৰ ব্যৱসায়ৰ আৰম্ভণিতে নিজৰ পাচলি বজাৰৰ দামতকৈ সস্তাতে বিক্ৰী কৰিছে।
বন্ধাকবিকে ধৰি বজাৰৰ আন শাক-পাচলিৰ তুলনাত বহুখিনি সস্তাত বিক্ৰী কৰিছে ধোনীয়ে।
বাতৰি অনুসৰি, ৰাঁচীৰ পাইকাৰী পাচলিৰ বজাৰত থকা ডলি মাৰ্কেটৰ পৰা অলপ আগলৈ গ’লেই ধোনীৰ পাচলিৰ বিপণী য’ত প্ৰাক্তন অধিনায়কগৰাকীৰ খেতিত উৎপন্ন শাক-পাচলি বিক্ৰী কৰা হৈছে।
জানিব পৰা মতে, বন্ধাকবি প্ৰতি কিলোত ১০টকা, বিলাহী প্ৰতি কিলোত ৩০টকাত বিক্ৰী কৰা হৈছে। বেছিকৈ কিনিলে আৰু সস্তাতে দিয়া হৈছে পাচলি। সেয়ে, ধোনীৰ ব্যৱসায় ৰমৰমীয়া।
আনহাতে, গ্ৰাহকসকলেও ধোনীৰ ব্ৰেণ্ডৰ ট্যাগ লগোৱা পাচলিৰ প্ৰতি অধিক আকৰ্ষিত হোৱা দেখা গৈছে।
জানিব পৰা মতে, আৰু কেইদিনমানৰ ভিতৰতে ধোনীৰ পামৰ মটৰমাহ, ষ্ট্ৰবেৰি আৰু মুৰ্গীৰ কণীও বজাৰত পোৱা যাব।
অলপদিন আগতে জানিব পৰা গৈছিল যে ধোনীয়ে মুৰ্গী ব্যৱসায়ত হাত দিছে। তেওঁৰ পামত বিখ্যাত কড়কনাথ মুৰ্গীৰ ফাৰ্ম আৰম্ভ কৰিছে। এই মুৰ্গীৰ তেজ আৰু মাংস দুয়োটাই ক’লা আৰু ইয়াত ফ্যাট বা ক’লেষ্ট’ৰেল একেবাৰে নাই। বজাৰত ইয়াৰ মাংস ছাগলীৰ মাংসতকৈয়ো অধিক দামত বিক্ৰী হয়।
