অসমৰ প্ৰথম ডক্টৰেট, ঢাকা বিশ্ববিদ্যালয়ৰ প্ৰাক্তন ভাৰপ্ৰাপ্ত উপাচাৰ্য আৰু অসম সাহিত্য সভাৰ প্ৰাক্তন সভাপতি ড° ময়িদুল ইছলাম বড়াৰ ওপজা দিন শিৱসাগৰত আজি উদযাপন কৰা হয়।
২২ চেপ্তেম্বৰত শিৱসাগৰ জিলা সাহিত্য সভাৰ উদ্যোগত শিৱসাগৰ প্ৰেছ ক্লাবৰ প্ৰেক্ষাগৃহত অনুষ্ঠিত ওপজা দিন পালনৰ অনুষ্ঠানত ড° ময়িদুল ইছলাম বড়াৰ প্ৰতিচ্ছবিত বন্তি প্ৰজ্বলনেৰে শ্ৰদ্ধা নিবেদন কৰে শিক্ষাবিদ মুকুল নাথে।
কণমানি চামৰীনা চাদ্দিকে ড° ময়িদুল ইছলাম বড়া ৰচিত এটি কবিতা পাঠ কৰাৰ পিছতে শিৱসাগৰ জিলা সাহিত্য সভাৰ উপ-সভাপতি ড° প্ৰশান্ত কুমাৰ চুতীয়াই ওপজা দিনৰ কাৰ্যসূচীৰ উদ্বোধনী ভাষণ প্ৰদান কৰে।
সন্তোষ দত্তই আঁতধৰা অনুষ্ঠানত নিৰ্দিষ্ট বক্তা হিচাপে উপস্থিত থাকি অসম কবি সন্মিলনীৰ প্ৰাক্তন সভাপতি, বুৰঞ্জীবিদ প্ৰেম গগৈয়ে “বাহাৰিষ্টান ই গায়েবী’ৰ দৰে পাৰ্চি ভাষাৰ গ্ৰন্থৰ ইংৰাজীলৈ অনুবাদ কৰাৰ লগতে অসমীয়া ভাষা সাহিত্যলৈ যথেষ্ট অৱদান আগবঢ়োৱা ড° ময়িদুল ইছলাম বড়াৰ জীৱন আৰু কৰ্মৰাজিৰ ওপৰত আলোকপাত কৰে।
উক্ত অনুষ্ঠানত লিখক, সমালোচক চামচুল বাৰিক, চফিকুৰ ৰহমানকে ধৰি যথেষ্ট সংখ্যক লোক উপস্থিত থাকে।
