ক্ৰয় নকৰাকৈয়ে গাড়ীৰ R.C লাভ কৰি হতবাক হৈ পৰিছে এটি পৰিয়াল। বস্ত্ৰ নগৰী শুৱালকুছিত সংঘটিত হৈছে এই ঘটনা।
শুৱালকুছি নিবাসী প্ৰমোদ গায়ন কৰ্মসুত্ৰে পেচাত এজন মেজিক চালক। তেওঁৰ সৈতেই সংঘটিত হৈছে এই আজৱ ঘটনা। ঘটনাটো শুনিলে হয়তো আচৰিত হৈ পৰিব আপুনিও।
হঠাৎ প্ৰমোদ গায়ন নামৰ এই যুৱকজনৰ ভাড়া ঘৰলৈ ডাকযোগে আহি পালে এখন TVS কোম্পানীৰ NTORQ মটৰ চাইকেলৰ R.C. (ৰেজিষ্ট্ৰেশ্যন চাৰ্টিফিকেট)।
গুৱাহাটী মহানগৰ পৰিবহণ বিভাগৰ পৰিবহণ বিষয়া গৌতম দাসৰ চহী সম্বলিত R.C খন ডাকোৱালে দি গ’ল প্ৰমোদ গায়ন বাসগৃহত।
R.C খনত থকা নাম ঠিকনাও সম্পূৰ্ণ শুদ্ধ। R.C লাভ কৰাৰ পিছতে হতবাক প্ৰমোদ গায়ন। কিয়নো R.C লাভ কৰিছে ঠিকেই কিন্তু কোনো গাড়ীয়ে ক্ৰয় কৰা নাই প্ৰমোদ গায়নে। কিন্তু আচৰিত কথাটো হ’ল গাড়ী ক্ৰয় নকৰাকৈ কেনেকৈ পৰিবহণ বিভাগে তেওঁৰ নামত পঞ্জীয়ন কৰিলে এখন R.C।
R.C খন লাভ কৰাৰ পিছতে এতিয়া চিন্তিত হৈ পৰিছে লোকজন। লোকজনৰ মনত উদয় হৈছে ভয় শংকাৰ লগতে বহু প্ৰশ্ন। কেনেকৈ কোনো ধৰণৰ গাড়ী ক্ৰয় নকৰাকৈ লাভ কৰিলে R.C। কাৰ ভূলৰ বাবে তেওঁৰ নামত পঞ্জীয়ন হ’ল এই R.Cখন।
ঘটনা সন্দৰ্ভত লোকজনে শুৱালকুছি আৰক্ষীৰ ওচৰ চাপিছিল যদিও শুৱালকুছি আৰক্ষীয়ে লোকজনক কোন ধৰণৰ সহায় নকৰাৰ ফলত কাষ চাপিল সংবাদ মাধ্যমৰ।
