দেশত প্ৰবাসী শ্ৰমিকসকলে নিজ ৰাজ্যলৈ উভতিবৰ বাবে চলোৱা সংগ্ৰামৰ ছবি সকলোৱে দেখিছে।
পৰিবহনৰ কোনো উপায় নোহোৱাত শ শ কিলোমিটাৰ পদযাত্ৰাৰে ঘৰলৈ ঢাপলি মেলা বৃহৎ সংখ্যক শ্ৰমিকৰ দুৰ্দশাৰ ছবিও সকলোৰে পৰিচিত হৈ পৰিছে।
এনে সময়তে মধ্য প্ৰদেশৰ এগৰাকী ডাঙৰ সুৰা ব্যৱসায়ীয়ে চাৰিগৰাকী লোকক ভূপালৰ পৰা দিল্লীলৈ আনিবলৈ বুধবাৰে ১৮০ আসনযুক্ত বিমান (এয়াৰবাছ A320) ভাড়াত লয়।
চাৰিগৰাকী ব্যক্তিৰ ভিতৰত সুৰা ব্যৱসায়ীগৰাকীৰ কন্যা, তেওঁৰ দুগৰাকী সন্তান আৰু সন্তানক চোৱাচিতা কৰা আয়াগৰাকী আছে।
সুৰা ব্যৱসায়ী জগদীশ আৰোৰা মধ্য প্ৰদেশৰ ছোম ডিষ্টিলাৰিজৰ স্বত্তাধিকাৰী।
বাতৰি অনুসৰি, বিমানখন দিল্লীৰ পৰা ভাড়া কৰা হৈছে আৰু ৰাতিপুৱা ৯-৩০ বজাত দিল্লীৰ পৰা গৈ ১০-৩০ বজাত ভূপাল পায়।
ভূপালৰ পৰা পুনৰ যাত্ৰী চাৰিগৰাকীক লৈ প্ৰায় ১১-৩০ বজাত বিমানখন দিল্লীলৈ উৰা মাৰে।
বিমান পৰিবহন বিভাগৰ সূত্ৰ অনুসৰি, ছয় আৰু আঠখন আসনযুক্ত চাৰ্টাৰ্ড বিমানৰ দৰে আন বিকল্প আছে যদিও সুৰা ব্যৱসায়ীগৰাকীয়ে এয়াৰবাছ ল’বলৈ বিচাৰে।
জানিব পৰা মতে পইচা থকাসকলে আন যাত্ৰীৰে সৈতে যাত্ৰা কৰিব নিবিচাৰিলেও ছয়খন বা আঠখন আসনযুক্ত চাৰ্টাৰ্ড বিমানে সেই উদ্দেশ্য পূৰণ কৰিব পাৰে।
সুৰা ব্যৱসায়ীগৰাকীয়ে ভূপালৰ পৰা চাৰিগৰাকী ব্যক্তিক দিল্লীলৈ অনাৰ বাবদ ২০ৰপৰা ২৫ লাখ টকা খৰচ কৰিবলগা হৈছে বুলি অনুমান কৰা হৈছে।
