পত্নীক হত্যা কৰাৰ অপৰাধত কাৰাবাস খাটিছিল। হঠাৎ তেওঁ গম পালে যে তেওঁৰ পত্নী জীয়াই আছে আৰু আন এজন পুৰুষৰ লগত থাকে। এই চাঞ্চল্যকৰ ঘটনা সংঘটিত হৈছে কৰ্ণাটকৰ মহীচুৰুত। এই ঘটনা পোহৰলৈ অহাৰ পিছতে সকলো স্তম্ভিত হৈ পৰিল কিন্তু আচলতে এইটো কেনেকৈ ঘটিল? জীৱিত মানুহক হত্যা কৰাৰ অপৰাধত কিয় জেললৈ যাবলগীয়া হ’ল মহীচুৰুৰ লোকজন?
মহীচুৰুৰ কুশলনগৰ অঞ্চলৰ বাসিন্দা সুৰেশে আৰক্ষীৰ সৰু ভুলৰ বাবে এনে মূল্য ভৰিবলগীয়া হৈছিল। ২০২০ চনৰ ডিচেম্বৰৰ পৰা পত্নী মাল্লিগে নিৰুদ্দেশ হৈ আছিল। সুৰেশে নিৰুদ্দেশ হোৱা ব্যক্তিৰ ডায়েৰীও থানাত দাখিল কৰে।
কেইবামাহো অনুসন্ধানৰ অন্তত বেট্টদ্ৰপুৰা অঞ্চলৰ পৰা উদ্ধাৰ হয় এটা কংকাল। কোনো ধৰণৰ ডি এন এ টেষ্ট নকৰাকৈ আৰক্ষীয়ে কংকালটো সুৰেশৰ নিৰুদ্দেশ হোৱা পত্নীৰ বুলি চিনাক্ত কৰে।
ইয়াৰ পিছতে সুৰেশক পত্নীক হত্যা কৰাৰ অভিযোগত গ্ৰেপ্তাৰ কৰা হয়। তেওঁৰ নামত চাৰ্জশ্বীটো দাখিল কৰা হয়। এবছৰমান জেলত থাকে সুৰেশ।
এই গোচৰটোৱে ১ এপ্ৰিলত নাটকীয় ৰূপ ধাৰণ কৰে। সুৰেশৰ এজন বন্ধুৱে স্থানীয় হোটেল এখনত মাল্লিগেক দেখিছিল। সুৰেশৰ ‘মৃত’ পত্নীয়ে আন এজন পুৰুষৰ লগত বহি খাই আছিল। তেওঁক দেখা বন্ধুজনৰ নামো চাৰ্জ শ্বীটত উল্লেখ কৰা হৈছিল। লগে লগে তেওঁ আদালতত ঘটনাৰ খবৰ দিয়ে।
অৱশেষত মাল্লিগেই আদালতত স্বীকাৰ কৰে যে তেওঁ স্বামীক এৰি আন এজন পুৰুষক বিয়া কৰাইছে। সুৰেশহঁতৰ ঘৰৰ পৰা ২৫-৩০ কিলোমিটাৰ নিলগত শেট্টীহল্লী নামৰ গাঁৱত থাকে। ঘৰৰ পৰা পলায়ন কৰিবলৈ তেওঁ নিজৰ নিৰুদ্দেশৰ ভুৱা কাহিনী সজাইছিল।
পিছত উদ্ধাৰ হোৱা কংকালটোৰ ডি এন এ পৰীক্ষাত দেখা যায় যে ই মাল্লিগেৰ লগত মিল নাছিল। কিন্তু সেই সময়ত আৰক্ষীয়ে কংকালটোৰ ডি এন এ পৰীক্ষা নকৰাকৈ কিয় সেই সময়ত মাল্লিগেৰ বুলি ঘোষণা কৰিছিল? কিয় হত্যাৰ অভিযোগত সুৰেশৰ বিৰুদ্ধে অভিযোগনামা দাখিল কৰা হ’ল? কি প্ৰমাণৰ ভিত্তিত সুৰেশক গ্ৰেপ্তাৰ কৰা হৈছিল সেই কথা স্পষ্ট কৰিবলৈ কৈছে আদালতে।
