ৰাজস্থানত সংঘটিত এক জঘন্য কাণ্ডই সৃষ্টি কৰিছে চাঞ্চল্যৰ। যৌন কামনা চৰিতাৰ্থ কৰাত বাধা পোৱাৰ বাবেই দুই বন্ধুৱে প্ৰাণ ল’লে এজন ব্যক্তিৰ। এই ঘটনা পোহৰলৈ অহাৰ পিছতে সৰ্বত্ৰে ব্যাপক প্ৰতিক্ৰিয়াৰ সৃষ্টি হৈছে।
প্ৰকাশিত খবৰ অনুসৰি, যোৱা ২৬ ফেব্ৰুৱাৰীত বৰাণ জিলাত ওম প্ৰকাশ বৈৰৱা নামৰ ব্যক্তিজনক মৃত অৱস্থাত উদ্ধাৰ কৰা হৈছিল। ইয়াৰ পিছতে আৰক্ষীয়ে ঘটনা সন্দৰ্ভত তদন্ত আৰম্ভ কৰি বৈৰৱাৰ দুজন বন্ধু্ৰ সন্ধান চলায়।
আৰক্ষীয়ে জানিবলৈ দিয়া মতে, ইয়াৰে এজনক আটক কৰি ৰখাৰ বিপৰীতে আনজন ব্যক্তিয়ে গ্ৰেপ্তাৰৰ আশংকাত বিষাক্ত পদাৰ্থ সেৱন কৰে। অসুস্থ অৱস্থাত আৰক্ষীয়ে লোকজনক চিকিৎসালয়ত ভৰ্তি কৰে।
ধৃত দুই ব্যক্তিক বৰাণ চহৰৰে বাসিন্দা মুৰলীধৰ প্ৰজাপতি আৰু সুৰেন্দ্ৰ যাদৱ বুলি চিনাক্ত কৰা হৈছে। প্ৰাথমিক জেৰাৰ সময়ত প্ৰজাপতিয়ে স্বীকাৰ কৰে হত্যাকাণ্ডৰ কথা। তেওঁ লগতে প্ৰকাশ কৰে হত্যাৰ আঁৰৰ কাৰণ।
প্ৰজাপতিৰ স্বীকাৰোক্তিৰ ভিত্তিত আৰক্ষীয়ে প্ৰকাশ কৰা মতে হত্যাকাণ্ডৰ দিনটোত প্ৰজাপতি, যাদৱ আৰু বৈৰৱাই একেলগে সুৰা সেৱন কৰিছিল আৰু ওচৰৰ এখন গাঁৱলৈ প্ৰজাপতিৰ ভগ্নীক সাক্ষাৎ কৰিবলৈ গৈছিল।
উভতি অহাৰ পথত প্ৰজাপতি আৰু যাদৱে বৈৰৱাক প্ৰহাৰ কৰি হত্যা কৰিছিল। বৈৰৱাই তেওঁলোকৰ সৈতে মৌখিক যৌন সম্পৰ্ক স্থাপন কৰিবলৈ অস্বীকাৰ কৰাৰ বাবে দুয়োৱে এইদৰে তেওঁৰ প্ৰাণ লোৱা বুলি স্বীকাৰ কৰে প্ৰজাপতিয়ে।
স্থানীয় এগৰাকী আৰক্ষী বিষয়াই প্ৰকাশ কৰা মতে প্ৰজাপতিয়ে পথৰ দাঁতিত এখন ধাবা চলাইছিল যদিও আনজন অভিযুক্ত দৈনিক মজুৰি কৰ্মী আছিল। ঘটনা সন্দৰ্ভত তথ্য-প্ৰমাণ সংগ্ৰহ কৰি থকা হৈছে বুলি বিষয়াজনে লগতে কয়।
