দেশৰ দ্বিতীয় বৃহত্তম টেক কোম্পানী ইনফ’ছিছে কৰ্মচাৰীসকলৰ কৰ্ম অৰু জীৱনৰ মাজত ভাৰসাম্যৰ প্ৰতি গুৰুত্ব প্ৰদান কৰি এক যুগান্তকাৰী পদক্ষেপ গ্ৰহণ কৰিছে। কোম্পানীয়ে সকলো কৰ্মচাৰীলৈ ইমেইলযোগে নিৰ্দেশ জাৰি কৰিছে যে তেওঁলোকে কাম শেষ কৰি সময়মতে ঘৰলৈ যাব লাগিব। সৰ্বাধিক কৰ্মৰ সময় নিৰ্ধাৰণ কৰা হৈছে ৯ ঘণ্টা ১৫ মিনিট। যদি কৰ্মচাৰীয়ে এই নিৰ্ধাৰিত সময়তকৈ অধিক কাম কৰে, তেন্তে তেওঁলোকলৈ সতৰ্কবাণী প্ৰেৰণ কৰা হ’ব। এই নীতিয়ে ইনফ’ছিছৰ প্ৰতিষ্ঠাপক নাৰায়ণ মূৰ্তিৰ সপ্তাহৰ ৭০ ঘণ্টাৰ কৰ্মসময় নীতিৰ বিপৰীতে এক নতুন দিশৰ সূচনা কৰিছে।
উল্লেখ্য যে নাৰায়ণ মূৰ্তিয়ে বাৰে বাৰে যুৱক-যুৱতীসকলক সপ্তাহত ৭০ ঘণ্টা কাম কৰাৰ পৰামৰ্শ দি বিতৰ্কৰ সৃষ্টি কৰিছিল। তেওঁৰ এই মন্তব্যক ‘অবাধ্য দাসত্ব’ বুলি সমালোচনা কৰা হৈছিল। যোৱা বছৰৰ নৱেম্বৰত চিএনবিচিৰ গ্ল’বেল লিডাৰশ্বিপ ছামিটত ৭৮ বছৰীয়া মূৰ্তিয়ে কৈছিল, “এই কথা মই মোৰ কবৰলৈ লৈ যাম।” তেওঁ ১৯৮৬ চনত ভাৰতত কৰ্মসপ্তাহ ছয় দিনৰ পৰা পাঁচ দিনলৈ হ্ৰাস কৰাৰ সিদ্ধান্তৰ প্ৰতি হতাশা প্ৰকাশ কৰি কৈছিল যে তেওঁ এই পৰিৱৰ্তন কেতিয়াও মানি ল’ব নোৱাৰি।
কিন্তু তেওঁৰ বক্তব্যৰ বিপৰীতে ইনফ’ছিছে এতিয়া কৰ্মচাৰীৰ স্বাস্থ্য আৰু মানসিক সুস্থতাৰ প্ৰতি গুৰুত্ব দি এক নতুন ব্যৱস্থা প্ৰৱৰ্তন কৰিছে। কোম্পানীয়ে এক স্বয়ংক্ৰিয় ব্যৱস্থাৰ জৰিয়তে কৰ্মচাৰীৰ কৰ্মৰ সময় নিবিড়ভাৱে নিৰীক্ষণ কৰিব। এই ব্যৱস্থাত সৰ্বাধিক কৰ্মদিন, মুঠ কৰ্মঘণ্টা, আৰু দৈনিক গড় সময়ৰ তথ্য সংগ্ৰহ কৰা হ’ব। যদি কোনো কৰ্মচাৰীয়ে ৯ ঘণ্টা ১৫ মিনিটৰ অধিক কাম কৰে, তেন্তে তেওঁলোকক সতৰ্কবাণী জাৰি কৰা হ’ব। ৫ দিনলৈ সীমিত কৰা হৈছে কৰ্মসপ্তাহ।
বৰ্তমান ইনফ’ছিছৰ ৩,২৩,৫০০ কৰ্মচাৰী আছে। কোম্পানীৰ এইচআৰ বিভাগে এই নতুন ব্যৱস্থাৰ জৰিয়তে কৰ্মচাৰীৰ অতিৰিক্ত কৰ্মঘণ্টাৰ ওপৰত তীক্ষ্ণ নজৰ ৰাখিব। ২০২৩ চনৰ নীতি অনুসৰি, কৰ্মচাৰীসকলে মাহত কমেও ১০ দিন কাৰ্যালয়ত উপস্থিত থাকিব লাগিব। কৰাৰ মূল লক্ষ্য হৈছে কৰ্মচাৰীৰ স্বাস্থ্য আৰু কৰ্ম-জীৱনৰ ভাৰসাম্যক অগ্ৰাধিকাৰ দি কোম্পানী আৰু কৰ্মচাৰী উভয়ৰে ব্যৱসায়িক সফলতা নিশ্চিত কৰা বাবে ইমেইলযোগে কোম্পানীয়ে জনাইছে ।
