চি আই ডি বিষয়াৰ ভুৱা পৰিচয়েৰে নাবালিকা অপহৰণৰ চেষ্টা! মহানগৰীত গ্ৰেপ্তাৰ দুৰ্বৃত্ত
গুৱাহাটী মহানগৰীত ওলাইছে এইবাৰ ভুৱা চি আই ডি বিষয়া। চি আই ডি বিষয়াৰ ভুৱা পৰিচয়েৰে এগৰাকী নাবালিকা অপহৰণৰ চেষ্টা চলাইছে এক দুৰ্বৃত্তই।
এই অভিযোগত আৰক্ষীৰ ফান্দত পৰিছে দুৰ্বৃত্তগৰাকী। মহেন্দ্ৰ বৰা নামৰ এই অভিযুক্তজনক মহানগৰ আৰক্ষীয়ে ইতিমধ্যে গ্ৰেপ্তাৰ কৰিছে।
নাবালিকাগৰাকীৰ পৰিয়ালৰ অভিযোগ মতে, মহেন্দ্ৰ বৰা নামৰ এই লোকজনে নিজকে চি আই ডি বিষয়া বুলি পৰিচয় দি নাবালিকাগৰাকীৰ সৈতে সম্পৰ্ক স্থাপন কৰে।
অভিযুক্ত মহেন্দ্ৰ বৰা ক্ৰমে নাবালিকাগৰাকীৰ সৈতে অত্যন্ত ঘনিষ্ঠ হৈ পৰাৰ পিছতে সুযোগ বুজি নাবালিকাগৰাকীক অপহৰণ কৰা বুলি দাবী কৰে পৰিয়ালে।
দিছপুৰ থানাত দাখিল কৰা পৰিয়ালটোৰ এজাহাৰ অনুসৰি আৰক্ষীয়ে তালাচী অভিযান আৰম্ভ কৰে।
তেওঁলোকৰ ফোনৰ লোকেচনৰ ভিত্তিত আৰক্ষীয়ে সফলতাৰে সন্ধান উলিয়ায় নাবালিকাগৰাকী আৰু অভিযুক্ত মহেন্দ্ৰ বৰাৰ।
ইয়াৰ পিছতে আৰক্ষীয়ে মহেন্দ্ৰ বৰাক গ্ৰেপ্তাৰ কৰে বুলি জানিবলৈ দিয়ে। অৱশ্যে সমগ্ৰ ঘটনা সন্দৰ্ভত তদন্ত অব্যাহত ৰাখিছে বুলি আৰক্ষীয়ে জানিবলৈ দিছে।