বজাৰ ইণ্ডিয়াৰ শ্বপিং মলত তলা ওলমালে মঙলদৈ পৌৰসভাই
ব্যৱসায় প্ৰসাৰৰ বাবে মঙলদৈত মুকলি কৰা ‘বজাৰ ইণ্ডিয়া ফেমিলী’ নামৰ শ্বপিং মলটোৰ ব্যৱসায়িক গোষ্ঠীৱে পৌৰসভাৰ নীতি-নিয়মক অমান্য কৰি ব্যৱসায় অব্যাহত ৰখাৰ অভিযোগত বুধবাৰে মঙলদৈ পৌৰসভা, জিলা প্ৰশাসন আৰু আৰক্ষীয়ে প্ৰতিষ্ঠানটোত অনিৰ্দিষ্টকাললৈ তলা ওলমাই দিয়ে।
উল্লেখযোগ্য যে দেশৰ অন্য প্ৰান্তৰ লগতে যোৱা ২৭ ছেপ্তেম্বৰত বজাৰ ইণ্ডিয়াই মঙলদৈ চহৰত এই শ্বপিং মলটোৰ উদ্বোধন কৰিছিল। মলটোৰ উদ্বোধনৰ দিনাই বাধাৰ সন্মুখীন হ’বলগীয়া হৈছিল পৌৰসভাৰ।
পৌৰসভাৰ অভিযোগ অনুসৰি ব্যৱসায়িক গোষ্ঠীটোৱে মঙলদৈ চহৰৰ লক্ষ্মীনাথ বেজবৰুৱা পথৰ পাঁচ নম্বৰ ৱাৰ্ডত পঞ্চানন শৰ্মা নামৰ এজন লোকৰ এটি ব্যৱসায়িক গৃহ ভাড়াত লৈছিল। কিন্তু বজাৰ ইণ্ডিয়াই ব্যৱসায় আৰম্ভ কৰাৰ পূৰ্বে পাৰ্কিঙৰ সুবিধা, দুৰ্যোগকালত প্ৰস্থানৰ সুবিধা, বিজুলী সংযোগৰ ব্যৱস্থা বাণিজ্যিক অনুজ্ঞাপত্ৰ আদি গ্ৰহণ নতুবা আহৰণ কৰা নাছিল। সেয়ে শ্বপিং মলটোৰ উদ্বোধনৰ দিনাই পৌৰসভাই গোষ্ঠীটোক কাৰণ দৰ্শোৱাৰ জাননী দিছিল।
কিন্তু মন কৰিবলগীয়া যে প্ৰতিষ্ঠানটোৱে পৌৰসভাৰ নীতি-নিৰ্দেশনাক অংগুষ্ঠ প্ৰদৰ্শন কৰি অব্যাহত ৰাখিছিল ব্যৱসায়। সেয়ে কালি উক্ত প্ৰতিষ্ঠানটোৰ বিৰুদ্ধে মঙলদৈ পৌৰসভাই এনেদৰে কঠোৰ পদক্ষেপ গ্ৰহণ কৰা পৰিলক্ষিত হয়।