বুধবাৰে মাণিক সাহাই পুনৰবাৰ ত্ৰিপুৰাৰ মুখ্যমন্ত্ৰী হিচাপে শপত গ্ৰহণ কৰে। তেওঁৰ লগত আৰু আঠগৰাকী মন্ত্ৰীয়ে পদ আৰু গোপনীয়তাৰ শপত গ্ৰহণ কৰে।
শপত গ্ৰহণ অনুষ্ঠানত প্ৰধানমন্ত্ৰী নৰেন্দ্ৰ মোদীৰ লগতে বিজেপিৰ ৰাষ্ট্ৰীয় সভাপতি জে পি নাড্ডা আৰু কেন্দ্ৰীয় গৃহমন্ত্ৰী অমিত শ্বাহ থাকে।
শপত গ্ৰহণ অনুষ্ঠানত উপস্থিত থাকে অসমৰ মুখ্যমন্ত্ৰী তথা বিজেপিৰ নেডাৰ আহ্বায়ক ডঃ হিমন্ত বিশ্ব শৰ্মা, অৰুণাচল প্ৰদেশৰ মুখ্যমন্ত্ৰী পেমা খাণ্ডু, মণিপুৰৰ মুখ্যমন্ত্ৰী এন বীৰেণ সিং আৰু ছিকিমৰ মুখ্যমন্ত্ৰী পি এছ তামাং। বিগত বৰ্ষত মুখ্যমন্ত্ৰী পদৰ পৰা অপসাৰিত হোৱা ত্ৰিপুৰাৰ বিজেপিৰ প্ৰাক্তন মুখ্যমন্ত্ৰী বিপ্লৱ দেৱো মঞ্চত উপস্থিত আছিল।
উল্লেখ্য, ২০১৬ চনত বিজেপিত যোগদান কৰিছিল মাণিক সাহাই। ২০২২ চনত বিপ্লৱ দেৱক অপসাৰণ কৰি বিজেপিয়ে তেওঁক মুখ্যমন্ত্ৰীত্বৰ দায়িত্ব দিছিল। ২০২০ চনৰ পৰা ২০২২ চনলৈ তেওঁ ত্ৰিপুৰা বিজেপিৰ সভাপতি আছিল। ৭০ বছৰীয়া মাণিক সাহা পেছাত এগৰাকী দন্ত চিকিৎসক।
ইফালে বিৰোধী কংগ্ৰেছ আৰু চিপিএমৰ নেতৃত্বত বাওঁপন্থী দলসমূহে এই শপত গ্ৰহণ অনুষ্ঠান বৰ্জন কৰে। বিজেপি সমৰ্থকৰ হিংসাৰ অভিযোগ উত্থাপন কৰি এই সিদ্ধান্ত গ্ৰহণ কৰে।
বাওঁ মঞ্চৰ এক বিবৃতিত কোৱা হৈছে যে প্ৰাক্তন মুখ্যমন্ত্ৰী তথা চিপিএমৰ পলিটব্যুৰোৰ সদস্য মাণিক সৰকাৰ আৰু চিপিএম, চিপিআই, আৰএছপি আৰু ফৰৱাৰ্ড ব্লকৰ সম্পাদকসকলক ৰাজ্য চৰকাৰে শপতগ্ৰহণ অনুষ্ঠানত উপস্থিত থাকিবলৈ আমন্ত্ৰণ জনাইছিল যদিও ফ্ৰ’ণ্টে এই নিমন্ত্ৰণ গ্ৰহণ নকৰি কাৰ্যসূচী বৰ্জন কৰাৰ সিদ্ধান্ত লয়।
যোৱা ২ মাৰ্চত বিধান সভা নিৰ্বাচনৰ ফলাফল ঘোষণাৰ পাছৰে পৰা সমগ্ৰ ৰাজ্যতে ‘বিজেপি সমৰ্থক আৰু গুণ্ডাই হিংসাত্মক পৰিৱেশৰ সূচনা কৰিছে।
কংগ্ৰেছেও ইয়াৰ প্ৰতিবাদতে শপতগ্ৰহণ বৰ্জনৰ সিদ্ধান্ত গ্ৰহণ কৰে। ত্ৰিপুৰা প্ৰদেশ কংগ্ৰেছৰ মুৰব্বী তথা প্ৰাক্তন মন্ত্ৰী বীৰজিৎ সিনহাই কয় যে ২ মাৰ্চত বিধানসভা নিৰ্বাচনৰ ফলাফল ঘোষণাৰ পিছৰে পৰা ত্ৰিপুৰাত হাজাৰৰো অধিক হিংসাত্মক ঘটনা সংঘটিত হৈছে। শাসকীয় বিজেপিক দোষাৰোপ কৰি কংগ্ৰেছ নেতাগৰাকীয়ে কয় যে ধাৰাবাহিক হিংসাত্মক ঘটনাত কমেও তিনিজন লোক নিহত হোৱাৰ লগতে ২০০ৰো অধিক লোক আহত হৈছে।
