মণিপুৰৰ হিংসাত্মক ঘটনাই ৰাজ্যখনক অস্থিৰ কৰি ৰখাৰ সময়তে মণিপুৰ তথা উত্তৰ-পূৰ্বাঞ্চললৈ গৌৰৱ কঢ়িয়াই আনিলে মণিপুৰৰ এগৰাকী যুৱ চলচিত্ৰ পৰিচালকে। ৰাছিয়াৰ কাজানত অনুষ্ঠিত ১৯ সংখ্যক কাজান আন্তঃৰাষ্ট্ৰীয় মুছলমান চলচ্চিত্ৰ মহোৎসৱত শ্ৰেষ্ঠ পৰিচালকৰ বঁটা লাভ কৰি আন্তঃৰাষ্ট্ৰীয় স্বীকৃতি অৰ্জন কৰিছে মণিপুৰৰ চলচ্চিত্ৰ নিৰ্মাতা মায়াংলাম্বম ৰোমি মেইটেইয়ে।
তেওঁৰ প্ৰথমখন অবাণিজ্যিক ছবি ‘ইখোইগি ইউম’ (আমাৰ ঘৰ) য়ে কঠোৰ প্ৰতিযোগিতাৰ মাজতে এই সন্মানীয় সন্মান লাভ কৰে, য’ত বিশ্বৰ বিভিন্ন প্ৰান্তৰ ১২৭ খন ছবিয়ে বিভিন্ন শাখাত অংশগ্ৰহণ কৰিছিল।
কিন্তু এই উল্লেখযোগ্য কৃতিত্বৰ পিছতো তেখেত সুখী হ’ব পৰা নাই। মায়াংলাম্বম ৰোমি মেইটেইয়ে প্ৰকাশ কৰে, “মণিপুৰত কোনো সংঘাত নথকা হ’লে এই বঁটা লাভ কৰি মই অধিক সুখী হ’লোহেঁতেন।
‘‘সংঘৰ্ষই মণিপুৰত হাজাৰ হাজাৰ লোকক গৃহহীন কৰি তুলিছে, আৰু এই পৰিস্থিতিত বঁটা লাভ কৰাটো অৰ্থহীন যেন লাগে” – লগতে তেওঁ কয়।
উল্লেখ্য যে বঁটাপ্ৰাপ্ত ৮৯ মিনিটৰ এই ছবিখনে উত্তৰ-পূব ভাৰতৰ আটাইতকৈ ডাঙৰ মিঠা পানীৰ হ্ৰদ লোকটক হ্ৰদৰ আশে-পাশে শ্বুটিং কৰিছিল। এই হ্ৰদৰ আশে পাশে বাস কৰা মাছমৰীয়া সম্প্ৰদায়ৰ লোকসকলে চৰকাৰৰ পৰা উচ্ছেদৰ জাননীৰ সন্মুখীন হোৱা ঘটনাক কেন্দ্ৰ কৰি নিৰ্মাণ কৰা কৰা হৈছে এই ছবিখন।
উচ্ছেদৰ জাননীয়ে এই সাধাৰণ লোকসকলক জীৱিকাৰ সন্ধানত নিজৰ ঠাই এৰি যাবলৈ বাধ্য কৰিছে তথা উচ্ছেদে কিদৰে তেওঁলোকৰ জীৱনলৈ দুখ-যন্ত্ৰণা কঢ়িয়াই আনিছে সেয়া ছবিখনৰ মাজেৰে দাঙি ধৰা হৈছে।
উল্লেখ্য যে, আন্তঃৰাষ্ট্ৰীয় মঞ্চত মায়াংলাম্বাম ৰোমি মেইটেইৰ স্বীকৃতিয়ে তেওঁৰ কলাত্মক দক্ষতাক মূল্য দিয়াই নহয়, এই বঁটাই শান্তি আৰু স্থিতিশীলতাৰ বাবে হাহাকাৰ কৰি থকা মণিপুৰবাসীৰ কথাও আন্তঃৰাষ্ট্ৰীয় মজিয়াত দাঙি ধৰিছে।
