মণিপুৰত গোষ্ঠীগত হিংসাৰ আঁৰত ম্যানমাৰৰ পৰা অনুপ্ৰৱেশ কৰা উগ্ৰপন্থীৰ মুখ্য ভূমিকা আছে। প্ৰতিৰক্ষা বিশেষজ্ঞসকলে বহুদিনৰ পৰাই এই আশংকা কৰিছিল। এইবাৰ প্ৰমাণ আহিল সেনাবাহিনীলৈ।
চোৰাংচোৱা সূত্ৰৰ তথ্য অনুসৰি মণিপুৰত পুনৰ অশান্তিৰ সৃষ্টি কৰিবলৈ ম্যানমাৰ সীমান্ত পাৰ হৈ ৯০০ কুকি উগ্ৰপন্থীয়ে অনুপ্ৰৱেশ কৰিছে। চলিত মাহৰ শেষত তেওঁলোকে এক বৃহৎ সংগঠিত আক্ৰমণৰ পৰিকল্পনা কৰিছে।
চোৰাংচোৱাৰ সূত্ৰ অনুসৰি সেই ৯০০ কুকি উগ্ৰপন্থীয়ে ইতিমধ্যে ৩০টা গোটত বিভক্ত হৈ মণিপুৰৰ বিভিন্ন প্ৰান্তলৈ বিয়পি পৰিছে। সকলোকে সঠিকভাৱে প্ৰশিক্ষণ দিয়া হৈছে। ড্ৰোন আক্ৰমণতো অভ্যস্ত, জংঘলত যুদ্ধ চলোৱাৰ বাবেও তেওঁলোক পাৰদৰ্শী। সৰ্বভাৰতীয় সংবাদ মাধ্যমৰ এক সূত্ৰৰ মতে, চোৰাংচোৱা সংস্থাসমূহে ২৮ ছেপ্টেম্বৰৰ ভিতৰত এই আক্ৰমণ সংঘটিত হ’ব পাৰে বুলি অনুমান কৰিছে।
অৱশ্যে চোৰাংচোৱাৰ সূত্ৰৰ পৰা তথ্য লাভ কৰাৰ পিছতে সজাগ হৈ আছে নিৰাপত্তাৰক্ষী। মণিপুৰৰ নিৰাপত্তাৰ দায়িত্বত থকা নিৰাপত্তা উপদেষ্টা কুলদীপ সিঙে কয় যে যেতিয়ালৈকে আমি নিশ্চিত নহয় যে কোনো আক্ৰমণ নহ’ব, তেতিয়ালৈকে চোৰাংচোৱা তথ্যক ১০০ শতাংশ সঁচা বুলি লৈ প্ৰস্তুতি চলোৱা হৈছে। অৱশ্যে মণিপুৰৰ জনসাধাৰণক সকীয়াই দি সেনাই এতিয়ালৈকে কোনো বাৰ্তা প্ৰেৰণ কৰা নাই। ড্ৰোন উৰুৱাত নিষেধাজ্ঞাও জাৰি কৰা হোৱা নাই।
উল্লেখ্য যে মণিপুৰত বহু কুকি উগ্ৰপন্থী সংগঠন সক্ৰিয় হৈ আছে। একাধিক চোৰাংচোৱা সংস্থাৰ মতে এই বিচ্ছিন্নতাবাদীসকলক চীন আৰু আই এছ আইৰ সমৰ্থন আছে। ম্যানমাৰৰ উগ্ৰপন্থীক ব্যৱহাৰ কৰি ভাৰতত সন্ত্ৰাসবাদৰ ব্লু প্ৰিন্ট সৃষ্টি কৰা হৈছে। কেন্দ্ৰও সতৰ্ক। ইতিমধ্যে ভাৰত-ম্যানমাৰ সীমান্ত ছীল কৰাৰ কাম আৰম্ভ হৈছে। প্ৰায় ১ হাজাৰ ৬৪৩ কিলোমিটাৰ দৈৰ্ঘ্যৰ সীমান্ত ছীল কৰিবলৈ ৩১ হাজাৰ কোটি টকা খৰচ হ’ব।
