মণিপুৰৰ ৰাজধানী চহৰ ইম্ফলত বৃহস্পতিবাৰৰ পৰা আৰম্ভ হোৱা প্ৰথম সংখ্যক নৰ্থ-ইষ্ট অলিম্পিক গেইমছত ঘৰুৱা দল মণিপুৰে আৰম্ভণিৰ দিনাই উজ্জ্বীৱিত প্ৰদৰ্শনেৰে মেডেল তালিকাৰ শীৰ্ষত অধিষ্ঠিত হয়।
প্ৰথম দিনাই মণিপুৰে ১৯টা সোণ, ১৩টা ৰূপ আৰু ১৫টা ব্ৰঞ্জৰ সহায়ত মুঠ ৪৭টা পদকেৰে মেডেল তালিকাত প্ৰথম স্থান দখল কৰে। ইয়াৰ বিপৰীতে অৰুণাচল প্ৰদেশে ১২টা সোণ, ৫টা ৰূপ আৰু ১৪টা ব্ৰঞ্জ, অসমে ১০টা সোণ, ১৫টা ৰূপ আৰু ১১টা ব্ৰঞ্জৰ পদকেৰে ক্ৰমে দ্বিতীয় আৰু তৃতীয় দখল কৰে।
ইম্ফলস্থিত খুমান লাম্পাৰ্ক ক্ৰীড়া প্ৰকল্পত অনুষ্ঠিত হোৱা প্ৰতিযোগিতাখনত ঘৰুৱা দল মণিপুৰে উশ্বু, জুডো আৰু অসমে টাইকোৱানডো, এথলেটিকছ, জুডো আদিৰ জৰিয়তে প্ৰথম দিনাৰ খেলত সৰ্বাধিক পদক অৰ্জন কৰিবলৈ সক্ষম হয়।
ইফালে মহিলাৰ ৫হেজাৰ মিটাৰ দৌৰত নাগালেণ্ডৰ টি চুচই টিয়ে ১৯:১৫:৫৭ মিনিট সময়ৰ সহায়ত নাগালেণ্ডৰ হৈ প্ৰথমটো সোণৰ পদক অৰ্জন কৰে। আনহাতে নাগালেণ্ডৰে এথলীট চাংমোৱে ৰূপৰ পদক আৰু অৰুণাচল প্ৰদেশৰ য়াবাং টালিয়ে ব্ৰঞ্জৰ পদক লাভ কৰে।
আনহাতে কাৰাটে আৰু শ্বট পুটতো সোণৰ পদক অৰ্জন কৰে নাগালেণ্ডে। এইদৰে তিনিটা সোণ, ২টা ৰূপ আৰু ৫টা ব্ৰঞ্জৰ পদকেৰে মেডেল তালিকাৰ চতুৰ্থ স্থানত থাকে নাগালেণ্ড।
প্ৰথম দিনাৰ খেলত মিজোৰামে ১টা সোণ, ৪টা ৰূপ আৰু ১০টা ব্ৰঞ্জ পদক লাভ কৰাৰ বিপৰীতে ছিকিম, মেঘালয় আৰু ত্ৰিপুৰাই সোণৰ পদক অৰ্জন কৰাত ব্যৰ্থ হয়। এই পৰ্যন্ত মেঘালয়ে ৪টা ৰূপ, ৭টা ব্ৰঞ্জ, ছিকিমে ১টা ৰূপ আৰু ৫টা ব্ৰঞ্জ লাভ কৰাৰ বিপৰীতে ১টা ৰূপ আৰু ৪টা ব্ৰঞ্জৰ পদকেৰে তালিকাৰ অন্তিম স্থানত আছে ত্ৰিপুৰা।
উল্লেখযোগ্য যে মণিপুৰ অলিম্পিক সন্থাৰ দ্বাৰা আয়োজিত এই প্ৰতিযোগিতাখনত উত্তৰ-পূবৰ আঠখন ৰাজ্যই অংশগ্ৰহণ কৰিছে। ২৪-২৮ অক্টোবৰলৈ অনুষ্ঠিত হ’বলগীয়া প্ৰতিযোগিতাখনত মুঠ ১২টা ইভেণ্ট থাকিব। ইভেন্টসমূহ হ’ল এথলেটিকছ, আৰ্চাৰী, বক্সিং, ফুটবল, টাইকোৱানডো, টেবুল টেনিছ, ভাৰোত্তোলন, উশ্বু, বেডমিণ্টন, জুডো, কাৰাটে আৰু শ্বুটিং।
