বিবাহ বহিৰ্ভূত সম্পৰ্কৰ বাবে ইটোৰ পিছত সিটোকৈ হত্যাকাণ্ড পোহৰলৈ আহিছে। তাৰমাজতে লিভ-ইন পাৰ্টনাৰক হত্যাৰ অভিযোগ উত্থাপন হৈছে। মণিপুৰৰ এজন যুৱকৰ বিৰুদ্ধে এই অভিযোগ উত্থাপন হৈছে।
মণিপুৰৰ এগৰাকী যুৱতীক হত্যা কৰাৰ অভিযোগ উত্থাপন হৈছে যুৱকজনৰ বিৰুদ্ধে। যুৱকজনে সন্দেহ কৰে যে তেওঁৰ লিভ-ইন পাৰ্টনাৰৰ আন এজন ব্যক্তিৰ সৈতে সম্পৰ্ক গঢ় লৈ উঠিছে।
দক্ষিণ-পশ্চিম দিল্লীৰ মুনিৰ্কা অঞ্চলত সংঘটিত হৈছে এই ঘটনা। শনিবাৰে আৰক্ষীয়ে জনোৱা মতে, অভিযুক্তক গ্ৰেপ্তাৰ কৰা হৈছে।
আৰক্ষীৰ সূত্ৰ অনুসৰি ধৃত ব্যক্তিজনৰ নাম জগমিনথাং। ২৮ বছৰীয়া যুৱকজনৰ ঘৰ মণিপুৰৰ সেনাপতি অঞ্চলত। অভিযোগ অনুসৰি তেওঁ নিজৰ লিভ-ইন পাৰ্টনাৰ লোহিং জেনেঙক হত্যা কৰিছে।
২৭ বছৰীয়া যুৱতীগৰাকীৰ ঘৰ মণিপুৰৰ চুৰাচান্দপুৰত। এবছৰৰো অধিক সময় দুয়ো একেলগে আছিল। জগমিনথাঙে সন্দেহ কৰে যে লোহিঙে আন এজন ব্যক্তিৰ সৈতে সম্পৰ্ক গঢ়ি তুলিছিল। সেই সন্দেহত লোহিংক মৰিয়াই মৰা বুলি অভিযোগ উঠিছে।
এগৰাকী বিষয়াই জনোৱা মতে, মুনিৰ্কা অঞ্চলৰ ক্ৰান্তি চ’কৰ সমীপৰ এটা ঔষধৰ দোকানৰ সন্মুখত থকা বাসগৃহত এগৰাকী যুৱতীৰ মৃতদেহ পৰি থকা বুলি আৰক্ষীৰ নিয়ন্ত্ৰণ কক্ষত ফোন আহিছিল। যুৱতীগৰাকীৰ শৰীৰত আঘাতৰ চিন আছিল।
যোৱা ৮ তাৰিখে সেই বাসগৃহৰ ষষ্ঠ মহলাৰ এটা কোঠাৰ পৰা মৃতদেহটো উদ্ধাৰ কৰা হয়। এবছৰৰো অধিক কাল জগমিনথাঙে লোহিঙৰ লগত তাতেই বসবাস কৰি আছিল৷ আৰক্ষীয়ে জানিব পাৰিছে যে সোমবাৰে নিশা দুয়োজনে পাৰ্টিৰ ব্যৱস্থা কৰিছিল। তাত মণিপুৰৰ পৰা আৰু তিনিজন লোক আছিল।
আৰক্ষীয়ে জনোৱা মতে, মৃতদেহ উদ্ধাৰৰ পিছতে তদন্ত আৰম্ভ হয়। পাৰ্টিত উপস্থিত থকা লোকক সোধা-পোছা কৰাৰ পিছত আৰক্ষীয়ে জানিব পাৰে যে পাৰ্টিৰ সময়ত জগমিনথাঙে লোহিংক ভাবুকি দিছিল। ইয়াৰ দুদিন পূৰ্বে তেওঁ লোহিংক শাৰীৰিক নিৰ্যাতন চলাইছিল বুলিও অভিযোগ উঠিছে।
দক্ষিণ পশ্চিম দিল্লীৰ উপ-আৰক্ষী আয়ুক্ত সুৰেন্দ্ৰ চৌধৰীয়ে কয় যে ইয়াৰ পিছতে জগমিনথাঙক সোধা-পোছা কৰা হয়। তেওঁ প্ৰথমে আৰক্ষীক ভুৱা তথ্য দিছিল। কিন্তু পিছত যুৱকজনে নিজৰ অপৰাধ স্বীকাৰ কৰে।
