প্ৰাক্তন প্ৰধান মন্ত্ৰী ড০ মনমোহন সিঙে সোমবাৰে নোবেল বঁটা লাভ কৰা ভাৰতীয় মূলৰ অৰ্থনীতিবিদ অভিজিৎ বেনাৰ্জীক শুভেচ্ছা জনায়।
তেওঁ কয় যে দৰিদ্ৰতা নিৰ্মূল তথা নতুন কৌশলৰ উন্নয়ন সন্দৰ্ভত কৰা তেওঁৰ কাম সঁচাকৈয়ে কালজয়ী।
প্ৰাক্তন প্ৰধান মন্ত্ৰীগৰাকীয়ে কয় যে উন্নয়নমূলক অৰ্থনীতিত বেনাৰ্জীৰ নব্য উদ্ভাৱনসমূহ ভাৰতৰ দৰে উন্নয়নশীল দেশসমূহৰ নীতি নিৰ্দ্ধাৰণৰ ক্ষেত্ৰত প্ৰযোজ্য তথা উপযোগী।
বেনাৰ্জীলৈ লিখা এখন পত্ৰত সিঙে লিখিছে: ‘’এইটোৱে মোক অত্যন্ত আনন্দিত তথা গৌৰৱান্বিত কৰিছে যে আপুনি এতিয়া অৰ্থনীতিত নোবেল বঁটা লাভ কৰা দ্বিতীয় গৰাকী ভাৰতীয়।
‘’আপোনাক আৰু আপোনাৰ সহযোগী বিজয়ীসকললৈ মোৰ আন্তৰিক অভিনন্দন জনালোঁ। আপোনাৰ ‘ৰেণ্ডমাইজ্ড কন্ট্ৰ’ল ট্ৰায়েলছ’ৰ দৰে দৰিদ্ৰতা নিৰ্মূল তথা নতুন কৌশলৰ উন্নয়ন সন্দৰ্ভত কৰা পাণ্ডিত্যপূৰ্ণ কৰ্মসমূহ সঁচাকৈয়ে কালজয়ী,’’-সিঙে কয়।
নিজৰ শুভেচ্ছামূলক বাৰ্তাটোত প্ৰাক্তন প্ৰধান মন্ত্ৰীগৰাকীয়ে লগতে লিখিছে: ‘’মই এগৰাকী অৰ্থনীতিৰ ছাত্ৰ হিচাপে বিশেষভাৱে আনন্দিত যে কমিটিয়ে ভাৰতৰ দৰে উন্নয়নশীল দেশসমূহৰ নীতি নিৰ্দ্ধাৰণৰ ক্ষেত্ৰত প্ৰযোজ্য তথা উপযোগী অগ্ৰণী উদ্ভাৱনসমূহক সন্মানিত কৰাৰ বাবে নিৰ্বাচন কৰিলে।‘’
উল্লেখযোগ্য যে সোমবাৰে ইণ্ডো-আমেৰিকান অভিজিত বেনাৰ্জী, তেওঁৰ পত্নী এস্থাৰ দুফলো আৰু মাইকেল ক্ৰেমাৰলৈ সন্মিলিতভাৱে ২০১৯ বৰ্ষৰ অৰ্থনীতিৰ ন’বেল বঁটা আগবঢ়োৱা হয়।
বিশ্বব্যপি দৰিদ্ৰতা নিৰ্মূলৰ অৰ্থে পৰীক্ষামূলক পদ্ধতি (experimental approach to alleviating global poverty) শীৰ্ষক কৰ্মৰাজিৰ বাবে বিখ্যাত অৰ্থনীতিবিদ কেইগৰাকীলৈ এই বঁটা আগবোঢ়োৱা হৈছে।
ইয়াৰ পূৰ্বে ১৯৯৮ চনত অৰ্থনীতিত নোবেল বঁটা লাভ কৰা প্ৰথমগৰাকী ভাৰতীয় আছিল অৰ্মত্য সেন।
