বিগত ২০ বছৰ ধৰি আৰক্ষীৰ ‘মষ্ট ৱাণ্টেড’ তালিকাত আছিল বিক্ৰম গৌড়া। ২০ বছৰ ধৰি আৰক্ষীয়ে সন্ধান কৰি আছিল গৌড়াক। অৱশেষত বিক্ৰম গৌড়াক বিচাৰি পালে আৰক্ষীয়ে। কৰ্ণাটক আৰক্ষীয়ে গুলীয়াই হত্যা কৰে গৌড়াক।
উল্লেখ্য যে সশস্ত্ৰ মাওবাদী সংগ্ৰামৰ এগৰাকী শীৰ্ষ বিপ্লৱী নেতা আছিল বিক্ৰম গৌড়া।
সোমবাৰে কৰ্ণাটকৰ উডুপিত মাও বিৰোধী অভিযানৰ সময়ত তেওঁক আৰক্ষীয়ে গুলীয়াই হত্যা কৰে।
জানিব পৰা মতে, উডুপি আৰক্ষীয়ে হেবৰি তালুকৰ সমীপৰ এখন দোকানৰ পৰা ৫জন মাওবাদীয়ে সামগ্ৰী ক্ৰয় কৰাৰ খবৰ লাভ কৰে। সেই খবৰৰ ভিত্তিত আৰক্ষীয়ে নক্সাল বিৰোধী বাহিনীৰ সৈতে যোগাযোগ কৰে।
ইয়াৰ পিছত সেই অঞ্চলত যৌথ বাহিনীয়ে অভিযান আৰম্ভ কৰে। তাৰ পৰা কেইমিটাৰমান দূৰত কাবিনেল বনাঞ্চলত তালাচী অভিযান আৰম্ভ হয়।
আৰক্ষীৰ উপস্থিতিৰ খবৰ পোৱাৰ লগে লগে মাওবাদীয়ে নিৰ্বিচাৰে গুলীচালনা আৰম্ভ কৰে। নিৰাপত্তা বাহিনীয়েও প্ৰতুত্তৰ দিয়ে। দুয়োপক্ষৰ মাজত দীঘলীয়া গুলীচালনাৰ অন্তত উদ্ধাৰ হয় এজন মাওবাদীৰ মৃতদেহ। বাকী কেইজন মাওবাদী নেতাই পলায়ন কৰে।
জানিব পৰা মতে, মৃতদেহটো মাওবাদী নেতা বিক্ৰম গৌড়াৰ। যোৱা ২০ বছৰ ধৰি আৰক্ষীয়ে তেওঁক বিচাৰি আছিল।
উল্লেখ্য যে বিক্রম গৌড়াৰ দৰে এজন শীর্ষ মাওবাদী নেতাৰ মৃত্যু নিৰাপত্তা বাহিনীৰ বাবে এক বৃহৎ সফলতা।
আনহাতে, বাকী ২ৰ পৰা ৩জন মাওবাদীয়ে গভীৰ জংঘললৈ পলায়ন কৰিছে। তদন্তকাৰীয়ে জনোৱা মতে, তেওঁলোকক বিচাৰি উলিয়াবলৈ তালাচী অভিযান অব্যাহত আছে।
