উজনি অসমৰ অন্যতম পুৰণি উদ্যোগ মাৰ্ঘেৰিটাৰ উত্তৰ পূব কয়লা ক্ষেত্ৰৰ উৎপাদন ব্যাহত হৈ আছে যদিও একাংশ অসাধু ব্যৱসায়ীয়ে মাৰ্ঘেৰিটাৰ নামদাং বৰগোলাই আদি বিভিন্ন অঞ্চলত কয়লাৰ অবৈধ খনন আৰু সৰবৰাহ অব্যাহত ৰাখিছে।
নিশাৰ ভাগত নিয়মিত মেক্স ডাম্পাৰ আদি গাড়ীৰে কয়লাৰ সৰবৰাহ অব্যাহত ৰাখিছে। বিশেষকৈ একাংশ ইটা উদোগলৈ এই কয়লা সৰবৰাহ হৈ আহিছে।
আৰক্ষী প্ৰশাসনৰ প্ৰত্যক্ষ পৃষ্ঠপোষকতাতে এই অবৈধ কাৰ্য চলি থকাৰ অভিযোগ উত্থাপন হৈ অহাৰ সময়তে আজি পুৱা মাৰ্ঘেৰিটাৰ নাতিদূৰৈৰ দিহিঙ চাহ বাগিচাৰ সমিপৰ ৩১৫ নং ৰাষ্ট্ৰীয় ঘাই পথত ৬ খনকৈ চোৰাং কয়লা ভৰ্তি মেক্স মাৰ্ঘেৰিটা আৰক্ষীয়ে জব্দ কৰে।
লগতে মেক্স কেইখনৰ ৬ জন ড্ৰাইভাৰ আৰু দুই চোৰাং কয়লা ব্যৱসায়ীক গ্ৰেপ্তাৰ কৰে।
আনহাতে, চোৰাং কয়লা ব্যৱসায়ীয়ে ব্যৱহাৰ কৰা আই ২০ বিলাসী গাড়ী খনো জব্দ কৰিছে আৰক্ষীয়ে।
সোমবাৰে পুৱা মাৰ্ঘেৰিটা আৰক্ষীয়ে এক গোপন সূত্ৰে বৰগোলাইৰ পৰা তিনিচুকীয়া অভিমুখে চোৰাং কয়লা ভৰ্তি মেক্স কেইখন গৈ থকা তথ্য লাভ কৰি অভিযান চলাই এই গাড়ীকেইখন জব্দ কৰে ।
জব্দ কৰা মেক্স কেইখনৰ নম্বৰ হৈছে এ এচ ২৩ চিচি ০৭৬৮, এ এচ ২৩ বি চি ৫৫৯০, এ এচ ২৩ চি চি ৩২২২,এ এচ ২৩ বি চি ৫৩০৪, এ এচ ২৩ চি চি ১৬৬৫, এ এচ ০৬ গি চি ৭৯২৬।
বিপৰীতে আটকাধীন লোককেইজন হৈছে বিবেক ৰাও,অমিত তামাং, মনাই দেবনাথ, জাফৰ আলি, জমিৰ আলি, সুৰজিত খাৰোৱাৰ আৰু বীৰ বাহাদুৰ লামা।
