তিনিচুকীয়া জিলাৰ মাৰ্ঘেৰিটাৰ পৰা কয়লাৰ চোৰাং সৰবৰাহ অব্যাহত থকা তথ্য পোহৰলৈ আহিছে।
মাৰ্ঘেৰিটা আৰক্ষীয়ে দুখনকৈ চোৰাং কয়লাভৰ্তি ১২ চকীয়া ট্ৰাক নিশা জব্দ কৰে। জব্দ কৰা ট্ৰাক দুইখনৰ নম্বৰ হৈছে এ এচ ২৩ চি চি ০৪৮০ আৰু এ এচ ২৩ এ চি ৭৭৭৭ (।)
প্ৰাপ্ত তথ্য অনুসৰি ৰাজেশ য়াদব নামৰ যুৱক এজনে এই দুখন গাড়ীৰ অবৈধ এণ্ট্ৰিৰ নামত ৭০হাজাৰ টকা আদায় লৈছিল আৰু দেৱনাথ ব্ৰাডাৰ্চ এণ্টাৰপ্ৰাইজৰ নামত ৰাজেশ দেৱনাথ নামৰ কয়লা মাফিয়াগৰাকীয়ে সৰবৰাহ কৰিছিল এই চোৰাং কয়লাভৰ্তি ট্ৰাক দুখন।
আৰক্ষীয়ে ট্ৰাক দুখন মাৰ্ঘেৰিটা ৩১৫নং ৰাষ্ট্ৰীয় ঘাইপথত যোৱা নিশা জব্দ কৰাৰ লগতে সংগ্ৰাম চেত্ৰী, পংকজ সিং নামৰ দুই ড্ৰাইভাৰসহ কয়লা চোৰ ৰাজেশ দেৱনাথক আটক কৰে।
ধৃত ৰাজেশ দেৱনাথে সংবাদমাধ্যমৰ আগত জানিবলৈ দিয়া অনুসৰি চোৰাং কয়লাখিনি বৰগোলাই নিউকলনিস্থিত বাবুৱা সিঙৰ মালিকানাধীন ক্ৰেছাৰ মিলৰ ভিতৰত মেচাৰ্চ মাধবী ট্ৰেডাৰ্চ নামেৰ এটা কয়লা ডিপোত কেঁচা কয়লা মজুত কৰি নিশাৰ ভাগত ৰাজ্যৰ বিভিন্ন প্ৰান্তলৈ সৰবৰাহ কৰি আহিছিল।
ৰাজ্যত অব্যাহত থকা লকডাউন তথা সান্ধ্য আইনৰ নিস্তব্ধতাৰ সুবিধা লৈ বাবুৱা সিঙৰ উক্ত ক্ৰেছাৰ মিলৰ পৰা ৰাজেশ দেৱনাথে দুখন কয়লা ভৰ্তি ট্ৰাক কৌশলেৰে নি থকা অৱস্থাত মাৰ্ঘেৰিটা আৰক্ষীয়ে ট্ৰাকৰ লগতে দুজন চালকসহ ৰাজেশক আটক কৰি জেল হাজোতলৈ আজি সন্ধিয়া প্ৰেৰণ কৰে।
