দেশ স্বাধীন হোৱাৰ ৭৩ বছৰ অতিক্ৰম কৰাৰ পাছতো নিৰ্মাণ নহ’ল জাগুনৰ পৰা অৰুণাচল প্ৰদেশৰ সংযোগী বুঢ়ীদিহিং নৈৰ ওপৰত পকী দলং । আজিও বিপদ সংকুল অৱস্থাত পাৰ হবলগীয়া হৈছে দৈনিক হাজাৰ হাজাৰ লোক৷
৬ মাহ বাঁহ -কাঠেৰে নিৰ্মাণ হোৱা দলং আৰু ৬ মাহ যন্ত্ৰ চালিত নাৱেৰে যাতায়ত কৰে দুয়োখন ৰাজ্যৰ সীমামূৰীয়া ৰাইজে।
বাৰিষা কালত প্ৰত্যেক বছৰে জীয়াতু ভুগি আহিছে জাগুন গাঁও পঞ্চায়তৰ অন্তৰ্গত ৰাম নগৰ, চন্দ্ৰপুৰ, কথা ছেমাকে আদি কৰি প্ৰায় ছয় খনকৈ গাঁৱৰ চহা লোক সকলে ।
প্ৰত্যেক বছৰে কিমান সংখ্যক লোকে বুঢ়ীদিহিং নৈৰ বুকুত প্ৰাণ হেৰুৱাবলগীয়া হৈছে তাৰ কোনো হিচাব নাই ।
স্কুল কলেজৰ ছাত্ৰ ছাত্ৰী, ব্যৱসায় বাণিজ্য, ৰুগীয়া ব্যক্তি সকলে মৃত্যুক আগত লৈ বিপদ সংকুল অৱস্থাত পাৰ হব লগীয়া হয় বুঢ়ীদিহিং নৈৰ ঘাট ।
আনফালে জাগুন অৰুণাচল সংযোগী বুঢ়ীদিহিং ঘাটটো আঞ্চলিক পঞ্চায়তৰ দ্বাৰা নিবিদা জাৰি কৰি বছৰে বছৰে কৰ সংগ্ৰহ কৰি কোটি কোটি টকা আদায় কৰে যাত্ৰী সকলৰ পৰা ।
কিন্তু আজি পৰ্যন্ত নাই কোনো দলং নিৰ্মাণৰ যোগাত্মক ভূমিকা কোনো এখন চৰকাৰৰ পৰাই । ৰাইজে পাই আহিছে মাথোঁ ভুৱা প্ৰতিশ্ৰুতি জনপ্ৰতিনিধি সকলৰ পৰা ।
ইয়াৰ মাজতে মংগলবাৰে সন্ধিয়া সংঘটিত হোৱা এক দুৰ্ঘটনাৰ বাতৰি পোৱা গৈছে।
জাগুন অৰুণাচল সংযোগী বুঢ়ীদিহিং নৈৰ বুকুত সংঘটিত হয় এক ভয়ংকৰ দুৰ্ঘটনা৷ অৰুণাচল প্ৰদেশৰ বৰডুমচাৰ পৰা আহি থকা এ এছ ২৩ পি ৩৭২৫ নম্বৰৰ এখন এলটো মাৰুতি বাহন জাগুন ৰামনগৰ বুঢ়ীদিহিং নৈৰ ঘাটৰ এখন যন্ত্ৰ চালিত নাৱেদি পাৰ কৰি থকাৰ সময়ত হৰ্ঠাত মাৰুতি গাড়ীখন নৈৰ বুকুত পৰি উটি যায়৷ অৱশ্যে কথমপি প্ৰাণ ৰক্ষা পৰে গাড়ীৰ ভিতৰত থকা চালকসহ আন এজন সহযোগীৰ।
বাহন খন নৈত পৰাৰ লগে লগে বাহন খনৰ ভিতৰত থকা আৰোহী দুজন খিড়িকীয়েদি বাহিৰলৈ ওলাবলৈ সক্ষম হয় যদিও পানীত পৰা বাহন খন পানীৰ কোবাল সোঁতে বহু দুৰলৈকে উটুৱাই লৈ যায় ।
লগে লগে যন্ত্ৰ চালিত নাওখনে বাহন খন উদ্ধাৰ কৰিবলৈ চেষ্টা কৰিছিল যদিও বাহন খন উদ্ধাৰ কৰিবলৈ সক্ষম নহল । পৰবৰ্তী সময়ত একাংশ স্থানীয় ৰাইজৰ তৎপৰতাত বাহন খন উদ্ধাৰ কৰি এডাল ৰচীৰে বান্ধি ওপৰলৈ উঠাবলৈ সক্ষম হয় ।
এলটো বাহন খন জাগুন অঞ্চলৰ জনৈক চেতিয়া উপাধিৰ এজন ব্যক্তিৰ বুলি জানিব পৰা গৈছে ।
