‘ৰজা’ৰ বাবেই যেন আজি পুনৰ জীয়াতু ভূগিবলগীয়া হ’ল গুৱাহাটী মহানগৰীৰ মহানাগৰিকে।
মন্ত্ৰী হিমন্ত বিশ্ব শৰ্মাৰ সৈতে চাইকেল চলাই গৈ মনোনয়ন দাখিল সিদ্ধাৰ্থ ভট্টাচাৰ্যৰ, ফলত জিএছ ৰোডত সৃষ্টি হ’ল তীব্ৰ যান-জঁট।
ঢোলে দগৰে মনোনয়ন দিলে বিজেপিৰ অতুল বৰা আৰু অগপৰ ৰমেন্দ্ৰ নাৰায়ণ কলিতাই; ঘন্টা ঘন্টা জুৰি জীয়াতু ভুগিলে পথচাৰীয়ে।
বৃহস্পতি বাৰে গুৱাহাটীত বহু হাই প্ৰফাইল নেতায়ে মনোনয়ন দাখিল কৰে কাছাৰী স্থিত কামৰূপ মহানগৰ জিলা উপায়ুক্ত কাৰ্যালয়ত।
পূব গুৱাহাটী সমষ্টিৰ বিজেপি প্ৰাৰ্থী সিদ্ধাৰ্থ ভট্টাচাৰ্যই বিজেপিৰ প্ৰতাপী মন্ত্ৰী হিমন্ত বিশ্ব শৰ্মাৰ সৈতে চাইকেল চলাই মনোনয়ন দাখিল কৰে।
কিন্তু মন্ত্ৰী দুগৰাকীৰ সেই চাইকেল ৰেলীত হাজাৰ হাজাৰ সমৰ্থকে যোগদান কৰাত মহানগৰীৰ জি.এছ ৰোডত তীব্ৰ যান-জঁটৰ সৃষ্টি হয়।
ঘন্টা ঘন্টা ধৰি সৃষ্টি যান-জঁটৰ ফলত সাধাৰণ জনতা বা পথচাৰীয়ে জীয়াতু ভুগিবলগীয়া হয়।
কেৱল সিমানেই নহয়, ৰজাই মনোনয়ন দাখিল কৰিবলৈ যোৱাৰ ফলত সাধাৰণ জনতাক হাৰাশাস্তি কৰি কাছাৰী অঞ্চলৰ জিলা উপায়ুক্ত কাৰ্য্যালয়, গুৱাহাটী পৌৰ নিগমৰ কাৰ্য্যালয়, জিলা দণ্ডাধীশ আদালতত প্ৰৱেশ কৰিব নোৱাৰাকৈ আৰক্ষীয়ে বেৰিকেড দিয়ে।
অতুল বৰা আৰু ৰমেন্দ্ৰ নাৰায়ণ কলিতাই বৃহৎ সমদল বাহিৰ কৰাৰ ফলত আমবাৰীৰ পৰা গুৱাহাটী উচ্চ ন্যায়ালয়ৰ সন্মুখলৈকে তীব্ৰ যান-জঁটৰ সৃষ্টি হয়।
মনোনয়ন দাখিলৰ নামত সৃষ্টি হোৱা এই যান-জঁট বা হাৰাশাস্তি গণতান্ত্ৰিক দেশৰ নাগৰিক হিচাপে নিশ্চয়কৈ দুৰ্ভাগ্যজনক হিচাপে পৰিগণিত হৈছে।
