শিৱসাগৰ মাষ্টাৰ্ছ এথলেটিক সন্থাৰ উদ্যোগত তথা শিৱসাগৰ জিলা প্ৰশাসন আৰু শিৱসাগৰ ক্ৰীড়া সন্থাৰ সহযোগত আজিৰে পৰা নগৰৰ পিয়লি ফুকন ষ্টেডিয়ামত আৰম্ভ হয় ২৭ সংখ্যক সদৌ অসম মাষ্টাৰ্ছ এথলেটিকচ চেম্পিয়নশ্বিপ ২০১৮। প্ৰতিযোগিতাখন উদ্ধোধন কৰে শিৱসাগৰ জিলা উপায়ুক্ত পল্লৱ গোপাল ঝাই ।
উদ্ধোধনী অনুষ্ঠানৰ আৰম্ভণিতে এথলেটিকচ ফাউণ্ডেচনৰ স্বীকৃতিপ্ৰাপ্ত ৩২ খন জিলা শাখাৰ অংশগ্ৰহণ কৰা প্ৰতিযোগী দলসমূহে জিলা উপায়ুক্ত গৰাকীক কুচ-কৱাজৰ দ্বাৰা অভিবাদন জনায়।
ৰাজ্যৰ প্ৰায় ১৮৫০ গৰাকী মহিলা-পুৰুষ খেলুৱৈয়ে অংশ গ্ৰহণ কৰা এই প্ৰতিযোগিতাখন আজিৰ পৰা ৩০ ডিচেম্বৰলৈকে অনুষ্ঠিত হ’ব।
পাঁচ কিলোমিটাৰ খোজকঢ়া, দৌৰ, লং জাম্প, হাই জাম্প, ত্ৰিপুল জাম্প, জেভলিন থ্ৰ, শ্বটপুট, হেমাৰ থ্ৰ, বাধা দৌৰ আদি বিভিন্ন প্ৰতিযোগিতা অনুষ্ঠিত হ’বলগীয়া প্ৰতিযোগিতাখনত ৩৫ বছৰৰ পৰা ৯৫ বছৰৰ বয়সৰ প্ৰতিযোগীয়ে অংশ গ্ৰহণ কৰিব পাৰিব।
আজি ৩৫, ৪০, ৪৫ আৰু ৫০ বছৰ ঊৰ্ধ্বৰ পুৰুষ-মহিলাৰ ৫ কিলোমিটাৰ খোজ কঢ়া, ৫০, ৫৫, ৬০ আৰু ৬৫ বছৰ ঊৰ্ধ্বৰ পুৰুষ-মহিলাৰ ৮০০ মিটাৰ দৌৰ, ৩৫, ৪০, ৪৫, ৫০ আৰু ৯০ বছৰ ঊৰ্ধ্বৰ পুৰুষ-মহিলাৰ ১০০ মিটাৰ দৌৰ, সকলো গ্ৰুপৰ শ্বটপুট আৰু লং জাম্পৰ লগতে ৭০ আৰু ৮০ বছৰ ঊৰ্ধ্বৰ পুৰুষ-মহিলাৰ ৮০ মিটাৰ বাধা দৌৰৰ প্ৰাৰম্ভিক পৰ্যায়ৰ প্ৰতিযোগিতা অনুষ্ঠিত হয়।
ইফালে নাহৰকটীয়াৰ শান্তিপুৰ গাঁৱৰ বিজয় চাংমাই নামৰ ৮৮ বছৰীয়া দৌৰবিদ গৰাকীয়ে আজি ১০০ মিটাৰ দৌৰ প্ৰতিযোগিতাত অংশ লৈ নিজৰ মনৰ ভাৱ প্ৰকাশ কৰি কয় যে জ্যেষ্ঠ খেলুৱৈ সকলে নৱপ্ৰজন্মক প্ৰেৰণা আৰু উৎসাহ দিব লাগে। এই বুঢ়া বয়সত প্ৰাইজৰ বাবে নহয় নিজৰ স্বাস্থ্য ভালে ৰাখিবলৈ আৰু উঠি অহা নবপ্ৰজন্মক প্ৰেৰণা দিবৰ বাবে খেলিব লাগে বুলি।
আজিৰ অনুষ্ঠানত শিৱসাগৰ জিলাৰ আৰক্ষী অধীক্ষক সুবোধ সোণোৱাল, অসম মাষ্টাৰ্ছ এথলেটিক এছ’চিয়েচনৰ সভাপতি ভোগেশ্বৰ বৰুৱাকে ধৰি বহুটো জ্যোষ্ঠ ক্ৰীড়াবিদ, ক্ৰীড়া সংগঠকে ধৰি বহুটো গণ্য মান্য ব্যক্তি উপস্থিত থাকে।
