ইঞ্জিনিয়াৰিঙত নামভৰ্তিৰ বাবে উচ্চতৰ মাধ্যমিকত আৱশ্যক নহয় গণিত-ফিজিক্স: AICTE

ইমানদিনে ইঞ্জিনিয়াৰিঙত নামভৰ্তিৰ ক্ষেত্ৰত উচ্চতৰ মাধ্যমিকত গণিত আৰু ফিজিক্স থকাটো বাধ্যতামূলক আছিল। এই নিয়ম শিথিল কৰিলে অল ইণ্ডিয়া কাউন্সিল ফৰ টেকনিকেল এডুকেশ্যনে (AICTE)।

কাউন্সিলৰ নতুন গাইডলাইন অনুসৰি ২০২১-২২শিক্ষাবৰ্ষত BE আৰু BTech পাঠ্যক্ৰমত নামভৰ্তিৰ বাবে উচ্চতৰ মাধ্যমিক (১০+২শ্ৰেণী) পৰ্যায়ত গণিত আৰু ফিজিক্স বিষয় দুটা ঐচ্ছিক বা অপশ্যনেল ৰখা হৈছে।

স্বাভাৱিকতেই AICTEৰ নতুন গাইডলাইনক লৈ বিতৰ্কৰ সৃষ্টি হৈছে। ইয়াৰ ফলত অহা দিনবোৰত যিবোৰ ইঞ্জিনিয়াৰ সৃষ্টি হ’ব তেওঁলোকৰ মানদণ্ডক লৈ বিভিন্ন মহলত আশংকাই দেখা দিছে।

এতিয়ালৈকে দ্বাদশ শ্ৰেণীৰ পৰ্যায়ত শিক্ষাৰ্থীসকলৰ গণিত আৰু ফিজিক্স নাথাকিলে ইঞ্জিনিয়াৰিং তথা টেকন’লজিৰ ইউ জি প্ৰগ্ৰেমত নামভৰ্তিৰ সুযোগ পোৱা নগৈছিল।

কিন্তু ২০২১-২২শিক্ষাবৰ্ষত AICTEয়ে স্নাতক পৰ্যায়ত নামভৰ্তিৰ ক্ষেত্ৰত এনে চৰ্তৰ পৰিৱৰ্তন কৰিছে।

এতিয়াৰে পৰা এই বিষয়সমূহৰ ভিতৰত যিকোনো তিনিটা বিষয় লৈ উচ্চতৰ মাধ্যমিক উত্তীৰ্ণ হ’লেই BE বা BTech পাঠ্যক্ৰমত নামভৰ্তিৰ বাবে আবেদন কৰিব পাৰিব।

বিষয়সমূহ হৈছে:-   Physics / Mathematics / Chemistry / Computer Science / Electronics / Information Technology / Biology / Informatics Practices / Biotechnology / Technical Vocational Subject / Agriculture / Engineering Graphics / Business studies আৰু Entrepreneurship ।

আবেদনকাৰীসকলে তিনিটা বিষয় মিলি গড়ে ন্যুনতম ৪৫ শতাংশ (সংৰক্ষিত শ্ৰেণীৰ শিক্ষাৰ্থীৰ বাবে ৪০শতাংশ) নম্বৰ লাভ কৰিব লাগিব। এইক্ষেত্ৰত আন বেকগ্ৰাউণ্ডৰ পৰা আহি নামভৰ্তি কৰা শিক্ষাৰ্থীসকলে যাতে কোনো সমস্যাৰ সন্মুখীন হ’ব নালাগে তাৰ বাবে বিশ্ববিদ্যালয়সমূহে প্ৰয়োজন অনুসৰি ব্ৰীজ কোৰ্ছৰ ব্যৱস্থা কৰিব বুলিও AICTEৰ নতুন গাইডলাইনত কোৱা হৈছে।

কিন্তু শিক্ষাবিদসকলৰ একাংশ ধাৰণা যে ইঞ্জিনিয়াৰিঙৰ মূল ভিত্তি হৈছে গণিত। এনে এটা বিষয় বাদ দি ইঞ্জিনিয়াৰিঙৰ স্নাতক পৰ্যায়ত নামভৰ্তিৰ ক্ষেত্ৰত AICTEৰ নিৰ্দেশনা  শিক্ষাবিদসকলৰ সমালোচনাৰ সন্মুখীন হৈছে।