চৰকাৰী চিকিৎসালয়ত দুদিন চটফটাই বিশ্বনাথত মৃত্যু প্ৰসূতিৰ, ‘নাহিল’ চিকিৎসক
বিশ্বনাথ মহকুমা অসামৰিক চিকিৎসালয়ত চিকিৎসকৰ গাফিলতিৰ বাবেই মঙলবাৰে ৰাধিকা দাস নামৰ প্ৰসূতি এগৰাকীৰ কৰুণ মৃত্যু হোৱাৰ অভিযোগ তুলিছে পৰিয়ালে।
সোমবাৰে নিশাৰ পৰা মঙলবাৰৰ দিনালৈকে চিকিৎসালয়ৰ বিচনাত চটফটাই থকা প্ৰসূতিগৰাকীক, অভিযোগমতে, এবাৰ চাবলৈয়ো নাহিল চিকিৎসক। “আমি ডাক্তৰৰ ওচৰত গৈ কাকুতি-মিনতি কৰাৰ পিছতো তেওঁ মানুহজনীক এবাৰলৈ চাবলৈও নাহিল। নাৰ্চে এটা চেলাইন দিছিলে মাত্ৰ,” কান্দোনত ভাগি পৰা স্বামী বিকাশ দাসৰ মন্তব্য।
১২ ঘণ্টাতকৈয়ো অধিক সময় প্ৰসৱ যন্ত্ৰণাত কাতৰ বিহালীৰ ৰাংচালী গাঁৱৰ দুৰ্ভগীয়া মহিলাগৰাকীৰ মৃত্যুৰ পিছতে স্বামী আৰু আত্মীয়ৰ কান্দোনৰ ৰোল উঠে চিকিৎসালয়খনত। তিনিটা কণ কণ শিশু এৰি গৈছে মৃত মহিলাগৰাকীয়ে।
ইফালে অসমত প্ৰসৱকালীন মৃত্যু হ্ৰাসৰ বাবে চৰকাৰে ব্যৱস্থা গ্ৰহণৰ কথা ঘোষণা কৰি অহাৰ বিপৰীতে বিশ্বনাথৰ চৰকাৰী চিকিৎসালয়খনত জৰুৰীকালীন অৱস্থাতো ৰোগীয়ে দুৰ্গতি ভুগিব লগাৰ অভিযোগ উঠিছে।
অভিযোগ মতে চিকিৎসালয়খনত চিটি স্কেন কৰাৰ বাবেও নাই জেনেৰেটৰৰ ব্যৱস্থা আৰু বিজুলী নাথাকিলে ৰাতি একো কামেই নচলে জেনেৰেটৰৰ ব্যৱস্থা নথকা চিকিৎসালয়খনত।