মাষ্টাৰ অফ কম্পিউটাৰ এপ্লিকেশ্যন (এম চি এ)ৰ তিনিবছৰীয়া পাঠ্যক্ৰম দুবছৰলৈ হ্ৰাস কৰা হৈছে।
২০২০-২১ শিক্ষাবৰ্ষৰ পৰা এম চি এৰ পাঠ্যক্ৰম তিনিবছৰৰ পৰিৱৰ্তে দুবছৰীয়া হ’ব।
অল ইণ্ডিয়া কাউঞ্চিল অফ টেকনিকেল এডুকেশ্যন চমুকৈ এ আই চি টি ইয়ে মঙলবাৰে নিজৰ টুইটাৰ হেণ্ডলযোগে এই কথা ৰাজহুৱা কৰে।
২০১৯ বৰ্ষৰ ডিচেম্বৰ মাহতে বিশ্ববিদ্যালয় অনুদান আয়োগ চমুকৈ য়ু জি চিৰ ৫৪৫ সংখ্যক বৈঠকত এই সিদ্ধান্ত গ্ৰহণ কৰা হৈছিল।
নতুন নিৰ্দেশনা অনুসি যিসক ছাত্ৰ-ছাত্ৰীয়ে বি চি এ অথবা কম্পিউটাৰ চায়েঞ্চ বিভাগত স্নাতক উত্তীৰ্ণ হৈছে নতুবা বি এছ চি/ বি কম/ উচ্চতৰ মাধ্যমিকত গণিত বিষয় সহ বি এ উত্তীৰ্ণ হৈছে তেওঁলোকে এই এম চি এ পাঠ্যক্ৰমত নামভৰ্তিৰ বাবে যোগ্য হ’ব।
অৱশ্যে এইক্ষেত্ৰত আবেদন কৰা ছাত্ৰ-ছাত্ৰী গৰাকীয়ে ৫৫ শতাংশ নম্বৰ পাব লাগিব (৪৫ শতাংশ সংৰক্ষিত ছাত্ৰ-ছাত্ৰী সকলৰ বাবে)।
উল্লেখযোগ্য যে, ক’ৰ’না ভাইৰাছৰ সংক্ৰমণৰ পৰিপ্ৰেক্ষিতত চি বি এছ চিয়েও নৱম মান শ্ৰেণীৰ পৰা দ্বাদশ শ্ৰেণীলৈ ছাত্ৰ-ছাত্ৰী সকলৰ পাঠ্যক্ৰম ৩০ শতাংশ হ্ৰাস কৰাৰ সিদ্ধান্ত গ্ৰহণ কৰিছে।
কেন্দ্ৰীয় মানৱ সম্পদ বিকাশ মন্ত্ৰী ৰমেশ পোখৰিয়ালে এই কথা ঘোষণা কৰিছিল।
