ৰাজ্যত বৃদ্ধি পোৱা জাপানীজ একফেলাইটিছৰ বৰ্ধিত প্ৰাদুৰ্ভাৱৰ প্ৰতি লক্ষ্যৰাখি আজি অসম চৰকাৰৰ স্বাস্থ্য মন্ত্ৰী হিমন্ত বিশ্ব শৰ্মাই জনতা ভাৱনৰ ই-ব্লকত এখন সংবাদ মেল আয়োজন কৰি এই ক্ষেত্ৰত অসম চৰকাৰে লোৱা পদক্ষেপৰ বিষয়ে উল্লেখ কৰে।
শৰ্মাই সংবাদমেলত জাপানীজ এনকেফেলাইটিছ তিনিটা পৰ্য্যায়ত হয় বুলি উল্লেখ কৰি কয় যে প্রথম পৰ্যায় অৰ্থাৎ জ্বৰ হোৱা পৰ্যায়তে ইয়াক চিনাক্ত কৰিব পাৰিলে প্ৰাথমিক চিকিৎসালয়তে বেমাৰবিধৰ নিৰাময় কৰিব পৰা যায়।
স্বাস্থ্য মন্ত্ৰীগৰাকীয়ে ৰাজ্যত বৃদ্ধি পোৱা জাপানীজ এনকেফেলাইটিছ ৰোগীৰ সংখ্যাৰ প্ৰতি লক্ষ্যৰাখি ৰাজ্য চৰকাৰে অসমৰ সকলো চিকিৎসা মহাবিদ্যালয়সমূহৰ আই চি য়ুত জাপানীজ এনকেফেলাইটিছ ৰোগৰ চিকিৎসা আৰু ঔষধ বিনামূলীয়া কৰাৰ কথা ঘোষণা কৰে।
আনহাতে, জাপানীজ এনেকেফেলাইটিছ ৰোগত আক্ৰান্ত ৰোগীক চিকিৎসালয়লৈ লৈ অহাৰ সময়ত যদি তেওঁলোকে চৰকাৰৰ ১০২ আৰু ১০৮ সেৱা লাভ নকৰে তেনেহ’লে অসম চৰকাৰৰ তৰফৰ পৰা ৰোগীগৰাকীক চিকিৎসালয়লৈ অনাৰ বাবে ১০০০ টকাৰ পৰিবহণ ব্যয় প্ৰদান কৰা হ’ব বুলি স্বাস্থ্য মন্ত্ৰীগৰাকীয়ে সংবাদ মেলত ঘোষণা কৰে। চিকিৎসালয়ৰ পৰাই তাৎক্ষণিকভাৱে ধনৰাশি আক্ৰান্ত পৰিয়ালক প্ৰদান কৰাৰ ব্যৱস্থা কৰা হ’ব বুলিও তেওঁ সংবাদ মেলত উল্লেখ কৰে।
তদুপৰি, ব্যক্তিগত খণ্ডৰ চিকিৎসালয়সমূহৰ আই চি য়ুত ভৰ্তি হোৱা ৰোগীসকলকো অসম চৰকাৰে এক লাখ টকাৰ সাহায্য প্ৰদান কৰিব বুলি ঘোষণা কৰে। এই ক্ষেত্ৰত অসম চৰকাৰে এটা হেল্প লাইন নম্বৰ মুকলি কৰিব বুলি উল্লেখ কৰি শৰ্মাই এই হেল্প লাইন নম্বৰত যোগাযোগ কৰিলেই ৰোগীৰ পৰিয়ালে চৰকাৰৰ সাহায্য লাভ কৰিব পাৰিব বুলি কয়।
সংবাদমেলত স্বাস্থ্যমন্ত্ৰীগৰাকীয়ে ছেপ্তম্বৰৰ ৩০ তাৰিখলৈ চৰকাৰী ডাক্তৰ, নাৰ্চ তথা সকলো কৰ্মচাৰীৰ ছুটী বাতিল কৰা বুলি ঘোষণা কৰে আৰু এই সময়ছোৱাত চিকিৎসা কৰ্মচাৰীসকলে কৰ্মস্থলীত উপস্থিত থাকি দায়িত্ব পালন কৰাৰ বাবে নিৰ্দেশ দিয়ে। এই ক্ষেত্ৰত কোনো লোকে কৰ্তব্যস্থলীত চিকিৎসক, কৰ্মচাৰী উপস্থিত নাই বুলি অভিযোগ উত্থাপন কৰিলে অসম চৰকাৰে সেই চিকিৎসক, কৰ্মচাৰীৰ বিৰুদ্ধে এফ আই আৰ দাখিল কৰিব বুলিও শৰ্মাই কয়।
তাৰোপৰি, আজিৰে পৰা নাৰ্চ, এম পি ডব্লিউ কৰ্মচাৰী, আশা কৰ্মীসকলে সংগ্ৰহ কৰা প্ৰতিটো তেজৰ নমুনাৰ বিপৰীতে চৰকাৰৰ তৰফৰ পৰা ৫ টকাকৈ সাহায্য লাভ কৰিব বুলিও তেওঁ সংবাদ মেলত ঘোষণা কৰে।
শৰ্মাই অসমৰ জনসাধাৰণক জাপানীজ এনকেফেলাইটিছ ৰোগক লৈ আতংকিত নহবলৈ অনুৰোধ কৰি এই ক্ষেত্ৰত সজগতা অৱলম্বন কৰি ৰোগবিধ নিৰ্মূল কৰাত চৰকাৰক সহায় কৰাৰ বাবে আহ্বান জনায়।
