চিকিৎসকৰ গাফিলতি! ৰোগীৰ সলনি পিতৃৰ অস্ত্ৰোপচাৰ, তাৰ পিছত…

ৰাজস্থানৰ কোটা মেডিকেল কলেজ হাস্পতালত সংঘটিত এক চাঞ্চল্যকৰ ঘটনাই চিকিৎসকৰ গাফিলতিৰ ভয়ংকৰ ৰূপ পোহৰলৈ আনিছে। চিকিৎসকৰ ভুলৰ বাবে ভাবুকি নামি আহিছে এজন ব্যক্তিৰ জীৱনলৈ। জানিব পৰা মতে, এজন ৰোগীৰ সলনি তেওঁৰ পিতৃৰ অস্ত্ৰোপচাৰ কৰা হয়। ভুলটো বুজিব পাৰি পিছত চিকিৎসকে ভুক্তভোগীক অপাৰেশ্যন থিয়েটাৰৰ বাহিৰলৈ লৈ আহে। এই ঘটনাৰ পিছত ভুক্তভোগীৰ পৰিয়ালে হাস্পতাল কৰ্তৃপক্ষৰ ওচৰত অভিযোগ দাখিল কৰিছে।

ঘটনাক্ৰম অনুসৰি অটৰু গাঁৱৰ মনীষ নামৰ এজন যুৱক কিছুদিন পূৰ্বে পথ দুৰ্ঘটনাত আহত হৈছিল। তেওঁৰ হাতৰ অস্ত্ৰোপচাৰৰ প্ৰয়োজন হোৱাত পৰিয়ালটোৱে তেওঁক কোটা মেডিকেল কলেজ হাস্পতাললৈ নিয়ে। কিন্তু আচৰিত কথা যে, চিকিৎসকে মনীষৰ সলনি তেওঁৰ পিতৃৰ হাতৰ অস্ত্ৰোপচাৰ কৰি পেলায়। পৰিয়ালৰ অভিযোগ, কোনো পৰীক্ষা-নীৰীক্ষা নকৰাকৈয়ে মনীষৰ পিতৃক অপাৰেশ্যন থিয়েটাৰলৈ নিয়া হৈছিল।

জানিব পৰা মতে, অস্ত্ৰোপচাৰৰ বাবে জগদীশ নামৰ এজন ৰোগীৰ নাম মতা হৈছিল। আচৰিতভাৱে, মনীষৰ পিতৃৰ নামো জগদীশ। অপাৰেশ্যন থিয়েটাৰৰ বাহিৰত দুয়োজন জগদীশ বহি থকা অৱস্থাত হাস্পতালৰ কৰ্মচাৰীয়ে নথি-পত্ৰ পৰীক্ষা নকৰাকৈ মনীষৰ পিতৃক ভিতৰলৈ লৈ যায়। অচেতন কৰি অস্ত্ৰোপচাৰ আৰম্ভ কৰাৰ পিছত চিকিৎসকসকলে ভুলটো ধৰা পেলায়। ততাতৈয়াকৈ হাতখন চিলাই কৰি তেওঁক অপাৰেশ্যন থিয়েটাৰৰ বাহিৰলৈ উলিয়াই আনে। এই ঘটনাই হাস্পতালত তীব্ৰ চাঞ্চল্যৰ সৃষ্টি কৰাৰ লগতে ৰোগীৰ সুৰক্ষাৰ ওপৰতো প্ৰশ্ন উত্থাপন কৰিছে। বৰ্তমান তদন্ত চলি আছে, আৰু হাস্পতাল কৰ্তৃপক্ষই এই বিষয়ত কি ব্যৱস্থা গ্ৰহণ কৰে, সেয়া পৰৱৰ্তী সময়ত লক্ষণীয় হ’ব।