চৈয়দ মুস্তাক আলী টি-২০ প্ৰতিযোগিতাৰ গ্ৰুপ-ডিৰ চতুৰ্থ ৰাউণ্ডৰ এখন খেলত চুবুৰীয়া মেঘালয়ৰ বিপক্ষে শোচনীয়ভাৱে পৰাস্ত হয় অসম।
মুম্বাইৰ ৱাংখেড়ে ষ্টেডিয়ামত মঙলবাৰে অনুষ্ঠিত খেলখনত মেঘালয় চাৰি উইকেটত বিজয়ী হয়।
টজত জয়ী হৈ মেঘালয়ে প্ৰথমে অসমক বেটিং কৰাৰ বাবে আমন্ত্ৰণ জনাই আৰু মেঘালয়ৰ তীক্ষ্ণ বলিং আক্ৰমণৰ বিৰুদ্ধে সংগ্ৰাম কৰি অসমে নিৰ্ধাৰিত ২০ অভাৰত ৭ টা উইকেটৰ বিনিময়ত মাত্ৰ ১০৮ ৰাণহে সংগ্ৰহ কৰিবলৈ সক্ষম হয়।
অসমৰ হৈ শিৱশংকৰ ৰয়ে সৰ্বাধিক ৫০ ৰাণ কৰাৰ বিপৰীতে চূড়ান্তভেৱে ব্যৰ্থ হয় দুই অপেনাৰ পল্লৱ কুমাৰ দাস(০), স্বৰূপম পুৰকায়স্থৰ(৫) লগতে আই পি এলত চমক সৃষ্টিকাৰী যুৱ ক্ৰিকেটাৰ ৰিয়ান পৰাগ(২)।
অসমে বান্ধি দিয়া ১০৮ ৰাণৰ প্ৰত্যুত্তৰত মেঘালয়ে দুই অপেনাৰ ৰাজ বিশ্ব আৰু পুনেত বিষ্টৰ সাৱলীল বেটিঙৰ সহায়ত ১৮.৫ অভাৰত ৬ টা উইকেট হেৰুৱাই নিৰ্ধাৰিত লক্ষ্যত উপনীত হয়।
অসমৰ হৈ বলিঙত স্বৰূপম পুৰকায়স্থই সৰ্বাধিক তিনিটা উইকেটো দখল কৰাৰ বিপৰীতে অভিলেষ গগৈ আৰু ৰোশন আলমে এটাকৈ উইকেট দখল কৰে।
