মুম্বাইৰ পৰা উত্তৰপ্ৰদেশলৈ তিনিখন ট্ৰাকত আহি থকা অৱস্থাত প্ৰব্ৰজিত শ্ৰমিকৰ এটা দলক মুম্বাই আৰক্ষীয়ে বৃহস্পতি বাৰে উদ্ধাৰ কৰে।
কলা প্লাষ্টিকেৰে ঢাকি অনা ট্ৰাককেইখনৰ ভিতৰত সোমাই প্ৰব্ৰজিত শ্ৰমিক সকলে নিজ নিজ গৃহ ৰাজ্যলৈ উভতি যোৱাৰ বাবে চেষ্টা কৰাৰ সময়তে মহাৰাষ্ট্ৰৰ জ্ঞানসাগৰ নগৰত আৰক্ষীয়ে শ্ৰমিক সকলক ট্ৰাকৰ ভিতৰত লুকাই থকা অৱস্থাত উদ্ধাৰ কৰে।
সমগ্ৰ ঘটনা সন্দৰ্ভত আৰক্ষীয়ে শ্ৰমিক সকলক সোধ-পোছ কৰাত প্ৰতি গৰাকী শ্ৰমিকে নিজ ৰাজ্যলৈ ঘুৰি অহাৰ বাবে ট্ৰাক চালকক ৩০০০ টকাকৈ আদায় দিছিল বুলি কয়।
আৰক্ষীয়ে ট্ৰাক চালক কেইজনক প্ৰব্ৰজিত শ্ৰমিক সকলে আদায় দিয়া টকাখিনি ঘুৰাই দিয়াৰ ব্যৱস্থা কৰি শ্ৰমিক সকলক যাবলৈ দিয়ে।
উল্লেখযোগ্য যে, ল’কডাউনৰ সময়ত দেশৰ বিভিন্ন প্ৰান্তত আৱদ্ধ হৈ থকা শ্ৰমিক সকলে নিজৰ ঘৰলৈ উভতি অহাৰ বাবে বিভিন্ন পন্থা হাতত লৈছে।
কিছু দিন পূৰ্বে তেলেংগানাত প্ৰব্ৰজিত শ্ৰমিকৰ এটা দলে গাখীৰৰ ট্ৰাকত সোমাই নিজ ঘৰলৈ উভতি আহি থকা অৱস্থাত আৰক্ষীৰ হাতত ধৰা পৰিছিল।
আশ্বৰ্যজনক কথা যে, যিটো সময়ত প্ৰব্ৰজিত শ্ৰমিক সকলে খাবলৈ এমুঠি ভাত পোৱা নাই বুলি অভিযোগ কৰি আহিছে সেই সময়ত ল’কডাউন ভংগ কৰি ঘৰলৈ উভতি অহাৰ বাবে কেনেদৰে বিভিন্ন পন্থা অৱলম্বন কৰি ২০০০-৩০০০ টকা আদায় দিব পাৰিছে সেয়া চিন্তনীয় বিষয়।
