জম্মু-কাশ্মীৰত পুনৰ বহি:ৰাজ্যৰ শ্ৰমিকৰ ওপৰত আক্ৰমণ সন্ত্ৰাসবাদীৰ। উপত্যকাটোৰ পুলৱামাত আজি উত্তৰ প্ৰদেশৰ এজন প্ৰব্ৰজনকাৰী শ্ৰমিকক সন্ত্ৰাসবাদীয়ে গুলীয়াই হত্যা কৰে।
কাশ্মীৰ জোন আৰক্ষীয়ে এক টুইট যোগে এই ঘটনাৰ বিষয়ে সদৰী কৰিছে। আৰক্ষীয়ে লগতে এই আক্ৰমণৰ পিছতে অঞ্চলটো ঘেৰাও কৰা হৈছে বুলি জানিবলৈ দিয়ে।
টুইটটোত উল্লেখ কৰা অনুসৰি, মৃত শ্ৰমিকগৰাকীক মুকেশ বুলি চিনাক্ত কৰা হৈছে। পুলৱামাৰ তুমচি নওপোৰা অঞ্চলত সন্ত্ৰাসবাদীৰ আক্ৰমণৰ চিকাৰ হয় উত্তৰ প্ৰদেশৰ এই শ্ৰমিকগৰাকী।
আক্ৰমণৰ পিছতে নিৰাপত্তা বাহিনীয়ে পুলৱামা আৰু জম্মু-কাশ্মীৰৰ অন্যান্য স্থানত বাহন আৰু পথচাৰীসকলৰ পৰীক্ষা তীব্ৰতৰ কৰি তুলিছে।
উল্লেখ্য যে, যোৱা ২৪ ঘণ্টাত পুলৱামাত এইটো দ্বিতীয় সন্ত্ৰাসবাদী আক্ৰমণ আছিল। দেওবাৰে মাছৰুৰ আহমেদ ৱানী নামৰ এগৰাকী আৰক্ষী বিষয়াক গুলীয়াই হত্যাৰ চেষ্টা কৰিছিল সন্ত্ৰাসবাদীয়ে।
শ্ৰীনগৰৰ ডাউনটাউন এলেকাৰ ঈদগাহ খেলপথাৰত ক্ৰিকেট খেলি থকাৰ সময়তে আৰক্ষী বিষয়াগৰাকীৰ ওপৰত গুলীচালনা কৰিছিল সন্ত্ৰাসবাদীয়ে। চিকিৎসাধীন বিষয়াগৰাকীৰ অৱস্থা সংকটজনক বুলি জানিব পৰা গৈছে।
