অসমত জাপানীজ এনকেফেলাইটিছ (JE) ৰোগে পুনৰ ভয়ংকৰ ৰূপ লৈছে। কেৱল গুৱাহাটী চিকিৎসা মহাবিদ্যালয় আৰু চিকিৎসালয় (GMCH)-তেই ২০২৪ চনৰ ১ এপ্ৰিলৰ পৰা ৪ জুলাইলৈকে এই ৰোগত ১৩ জন ৰোগীৰ মৃত্যু হোৱা বুলি স্বাস্থ্য বিভাগৰ সূত্ৰৰ পৰা জানিবলৈ পোৱা গৈছে।
GMCH-ৰ উপ-অধীক্ষক ডাঃ উজ্জ্বল কুমাৰ শৰ্মাই জনোৱা অনুসৰি, এই সময়ছোৱাৰ ভিতৰত মুঠ ৫০ জন জাপানীজ এনকেফেলাইটিছত আক্ৰান্ত ৰোগীক GMCH-ত ভৰ্তি কৰা হৈছিল। ইয়াৰে ৬ জন সুস্থ হৈ ঘৰলৈ গ’ল, আনহাতে ৩ জন চিকিৎসাৰ পৰামৰ্শ মানি নচলাকৈ চিকিৎসালয় এৰি গ’ল। বাকি ৰোগীসকলৰ ভিতৰত ১৩ জনে প্ৰাণ হেৰুৱায়।
চিকিৎসালয় সূত্ৰৰ মতে, আক্ৰান্তসকলৰ ভিতৰত ১৪ জন কামৰূপ (গ্ৰাম্য), ১০ জন নলবাৰী, আৰু ৭ জন দৰং জিলাৰ বাসিন্দা। লগতে কামৰূপ (মেট্ৰ’)-ৰ ৩ জন ৰোগীও এই তালিকাত আছে। এই পৰিসংখ্যাই পৰিষ্কাৰকৈ সূচায় যে ৰাজ্যত পুনৰ জাপানীজ এনকেফেলাইটিছ ৰ সংক্ৰামক অৱস্থা বিদ্যমান।
উল্লেখ্য যে জাপানীজ এনকেফেলাইটিছ এনে এক ৰোগ, যি মূলতঃ ক্যুলেক্স প্ৰজাতিৰ মহৰ জৰিয়তে বিয়পে। এই মহ সাধাৰণতে গাঁও অঞ্চলৰ পঁচা পানী, দোলা-ডবিত প্ৰজনন কৰে। গাহৰি আৰু অৰ্দ্ধজলচৰ চৰাই এই ভাইৰাছৰ প্ৰাকৃতিক বাহক হিচাপে কাম কৰে। যদিও এই ৰোগ মানুহৰ পৰা মানুহলৈ বিয়পি নাযায়, তথাপিও একবাৰ আক্ৰান্ত হ’লে মস্তিষ্কলৈ প্ৰভাৱ পেলাই আৰু আক্ৰান্তৰ মৃত্যুৰ হাৰ বেচি।
স্বাস্থ্য বিভাগৰ তথ্য অনুসৰি, ২০১৫ চনৰ পৰা ২০২৪ চনলৈকে অসমত মুঠ ৮৪০ ৰো অধিক লোকে এই ৰোগত প্ৰাণ হেৰুৱাইছে। ২০১৯ চনত কেৱল এটা বছৰতে ১৬১ জন ৰোগীৰ মৃত্যু হৈছিল, যিটো এই সময়সীমাৰ ভিতৰত আটাইতকৈ বেছি মৃত্যুৰ সংখ্যা আছিল।
এই ৰোগ কেৱল অসমতে সীমাবদ্ধ নহয়। সেয়েৱ দেশোজুৰি সতর্কতা জাৰী কৰা হৈছে। ২০২৪ চনৰ নৱেম্বৰ মাহত দিল্লীৰ উত্তম নগৰত এজন ৭২ বছৰীয়া বয়স্ক ৰোগীৰ শৰীৰতো জাপানীজ এনকেফেলাইটিছ ধৰা পৰিছিল, যদিও স্বাস্থ্য বিভাগে স্পষ্টকৈ জানিবলৈ দিছিল যে দিল্লীত এই ৰোগৰ কোনো মহামাৰীৰ প্ৰাদুৰ্ভাৱ নাই।
অসম চৰকাৰ আৰু স্বাস্থ্য বিভাগে বিশেষকৈ উচ্চ সম্ভাবনা পূৰ্ণ অঞ্চলসমূহত টিকাকৰণ অভিযান, আগতীয়াকৈ ৰোগ ধৰা-পৰা ব্যৱস্থা আৰু মহ নিয়ন্ত্ৰণমূলক কাৰ্যসূচী অধিক জোৰদাৰ কৰা হৈছে বুলি জানিবলৈ দিছে। জনসাধাৰণো সচেতন থকাটো অতন্ত্য প্ৰয়োজন, বিশেষকৈ যাতে পচা পানী জমা নহয়, মহৰ পৰা সতৰ্কতা, আৰু লক্ষণ দেখা দিলেই তৎক্ষণাত চিকিৎসকৰ সৈতে পৰামৰ্শ কৰাৰ আহ্বান জনোৱা হৈছে।
