দেওবাৰে নিশা বৰপেটা জিলাৰ সৰভোগৰ আৰক্ষী থানাৰ অন্তৰ্গত বেঁকী নদীৰ ওপৰত থকা ৰে’লৱে ব্ৰীজত সংঘটিত এক দুৰ্ঘটনা সংঘটিত হয়। দুৰ্ঘটনাটোত এজন ৰে’লৱে কৰ্মচাৰী নিহত হোৱাৰ লগতে আন এজন গুৰুতৰভাৱে আহত হয়।
প্ৰাপ্ত তথ্য মতে নিহত ৰে’লৱে কৰ্মচাৰীজন ৰে’ল বিভাগৰ ইঞ্জিনিয়াৰিং বিভাগৰ কৰ্মচাৰী আছিল আৰু তেওঁক মিজানুৰ ৰহমান বুলি চিনাক্ত কৰা হৈছে।
লগতে নিহত মিজানুৰ ৰহমান সৰভোগৰ আৰক্ষী থানাৰ অন্তৰ্গত মাদুলীঝাৰ ডেকাৰবৰীৰ নিৱাসী ৰফিক আলীৰ পুত্ৰ বুলি জানিব পৰা গৈছে।
ঘটনাৰ বিৱৰণী মতে দেওবাৰে ৰহমানৰ বিয়লি চাৰি বজাৰ পৰা নিশা ১২ বজালৈকে ডিউটি আছিল। আৰু ইয়াৰ মাজতে কৰ্তব্যৰত অৱস্থাত নৰ্থ ইষ্ট ৰে’ল খনে ৰহমানক খন্দা মৰাত ৰহমানৰ মুণ্ড ছিন্ন হোৱাৰ লগতে দেহৰ বিভিন্ন অংশ ক্ষত বিক্ষত হৈ পৰে। ফলত ৰহমানে থিতাতে মৃত্যুক আঁকোৱালি লয়।
আনহাতে এই দুৰ্ঘটনাত হাফিজুৰ আলী নামৰ আন এজন ব্যক্তি আহত হোৱা বুলি জানিব পৰা গৈছে।
ইফালে এই দুৰ্ঘটনাৰ ফলত বহু সময় ধৰি ৰে’ল চলাচল বন্ধ হৈ পৰে। পিছত ৰে’লৱে আৰক্ষী ঘটনাস্থলীত উপস্থিত হৈ মৃতদেহ উদ্ধাৰ কৰি বৰপেটা ৰোড ষ্টেচনলৈ লৈ যায়।
