দেওবাৰে নিশা শিৱসাগৰৰ এটা এন আৰ চি সেৱা কেন্দ্ৰৰ নৈশ চকীদাৰক এদল সুৰামত্ত যুৱকে প্ৰহাৰ কৰা ঘটনাক লৈ ব্যাপক প্ৰতিক্ৰিয়াৰ সৃষ্টি হৈছে।
এন আৰ চিৰ চুড়ান্ত খচৰা প্ৰকাশৰ বাবে মাজত মাথোঁ দুটামান দিনহে বাকী আছে।
এনে অৱস্থাত শিৱসাগৰৰ কে পি চাৰিআলিৰ পুৰণি পুথিভঁড়ালত থকা এন আৰ চিৰ সেৱা কেন্দ্ৰটোৰ নৈশ চকীদাৰজনক পাঁচজনীয়া যুৱকৰ দল এটাই দেওবাৰে নিশা গুৰুলা গুৰুল কৈ প্ৰহাৰ কৰে।
দুৰ্বৃত্তৰ প্ৰহাৰত আহত নৈশ চকীদাৰ জনৰ নাম অতুল বৰা।
২০১৪ চনৰ পৰাই কেন্দ্ৰটোত তেওঁ নৈশ চকীদাৰ হিচাপে কৰ্মৰত আছিল।
মূৰ আৰু ডিঙিত আঘাতপ্ৰাপ্ত অতুল বৰা বৰ্তমান শিৱসাগৰ অসামৰিক চিকিৎসালয়ত চিকিৎসাধীন হৈ আছে।
অভিযোগ অনুসৰি এন আৰ চি সেৱা কেন্দ্ৰটোৰ চৌহদত চলি থকা আনন্দ মেলাৰ উদ্যোক্তাই নৈশ চকীদাৰজনক প্ৰহাৰ কৰে।
উল্লেখ্য যে বিগত দহ দিন মানৰ পূৰ্বৰে পৰা পুৰণি পুথিভঁড়ালৰ চৌহদত আনন্দ মেলা অনুষ্ঠিত হৈ আহিছে।
ইপিনে, এন আৰ চি সেৱা কেন্দ্ৰটোৰ সন্মুখত আৰক্ষীয়ে বহুকেইটা সুৰাৰ বটল উদ্ধাৰ কৰে।
এতিয়া প্ৰশ্ন হয়, উচ্চতম ন্যায়ালয়ৰ তত্বাৱধানত ৰাজ্যত এন আৰ চিৰ দৰে স্পৰ্শকাতৰ বিষয় এটাৰ কাম কাজ চলি থকাৰ সময়ত এনে এক ঘটনা কেনেকৈ ঘটিবলৈ পালে?
এন আৰ চিৰ সেৱা কেন্দ্ৰ য’ত বহু গুৰুত্বপূৰ্ণ তথ্য মজুত আছে,তেনে এক স্থানত আনন্দ মেলা পাতিবলৈ কিয় অনুমতি দিয়া হ’ল তাক লৈ শিৱসাগৰত তীব্ৰ প্ৰতিক্ৰিয়াৰ সৃষ্টি হৈছে।
