শেহতীয়াকৈ কেইবাটাও ৰাজনৈতিক পটপৰিৱৰ্তন দেখিবলৈ পোৱা মিজোৰামত অহা ২৮ নৱেম্বৰত বিধানসভাৰ নিৰ্বাচন অনুষ্ঠিত হ’ব। এয়া হ’ব ৰাজ্যখনৰ ৮ম বিধানসভাৰ নিৰ্বাচন। ঘাইকৈ মিজো নেশ্যনেল ফ্ৰণ্ট আৰু কংগ্ৰেছ দলে প্ৰাধান্য লাভ কৰি অহা ৰাজ্যখনত বৰ্তমান কংগ্ৰেছে শাসন কৰি আছে।
উল্লেখযোগ্য যে আজি দেশৰ নিৰ্বাচন আয়োগে মিজোৰামকে ধৰি ৫খন ৰাজ্যৰ নিৰ্বাচনৰ দিন ঘোষণা কৰিছে।
মন কৰিব লগীয়া কথাটো হ’ল উত্তৰ-পূবৰ ক্ষুদ্ৰ ৰাজ্যখনত শেহতীয়াকৈ শাসকীয় দল কংগ্ৰেছে দলীয় বিপৰ্য্যয়ৰ সন্মুখীন হৈছে। যোৱা মাহত দলটোৰ আৰ লালৰিনলিয়ানাই গৃহ মন্ত্ৰী হিচাপে পদত্যাগ কৰাৰ পিছতে দলে তেওঁক বহিষ্কাৰ কৰিছিল। আনহাতে মেঘালয়ত বৰ্তমান চৰকাৰ গঠন কৰি থকা দল এন পি পিৰ নেতাই তেওঁক সাক্ষাৎ কৰিছিল, যিটো ৰাজনৈতিকভাৱে তাৎপৰ্য্যপূৰ্ণ।
আজি নিৰ্বাচন আয়োগে ঘোষণা কৰামেত, মধ্য প্ৰদেশতো মিজোৰামৰ সৈতে একেদিনাই, অৰ্থাৎ ২৮ নৱেম্বৰতেই হ’ব ভোটগ্ৰহণ।
আনহাতে ছত্তিছগড়ত ১২ নৱেম্বৰ আৰু ২০ নৱেম্বৰ, দুটা পৰ্যায়ত অনুষ্ঠিত হ’ব নিৰ্বাচন। ৰাজস্থান আৰু তেলেংগানাৰ ভোটগ্ৰহণ হ’ব ৭ ডিচেম্বৰত। এই আটাইকেইখন ৰাজ্যৰ ভোটগণনা হ’ব অহা ১১ ডিচেম্বৰত।
